INKAMPANI KASHUKELA IHLOMULISE NGEMIFUNDAZE
INJABULO kubafundi abayishumi abenza izifundo zolimo behlomula ngemifundaze enkampanini ekhiqiza ushukela itongaat Hulett.
Ngokusho kwale nkampani, bangaphezulu kuka50 abafundi asebehlomule ohlelweni lokunikezelwa kwemifundaze selokhu lwasungulwa.
Unkz Snethemba Kunene, umphathi womnyanyo wezentuthuko yomphakathi kwatongaat Hulett, uthi ukubambisana kwenkampani nesikhungo sokufundela ezolimo, i-owen Sithole College of Agriculture, kwenze ukuthi intsha eqhamuka emiphakathini etshala umoba, ikwazi ukuthola imifundaze, iqhube izifundo zezolimo kuleli kolishi.
“Inhloso yokubambisana kwetongaat Hulett ne-owen Sithole College of Agriculture, wukulekelela ikolishi libe nedumela lokuba yisikhungo esigogodile emkhakheni wokutshala umoba,” kusho ukunene.
Abalekelelwa ngalo mfundaze, ngabafundi abanemiphumela emihle ngokwezemfundo, abakwazi ukusungula izinhlelo ezintsha nezithuthukisa ikoloshi nemiphakathi abaqhamuka kuyo, futhi kuba ngabafundi abanesibindi sokugqugquzela abanye ukwenza kahle ezifundweni zabo ukuze nabo bezoqokelwa ukuba yingxenye yalo mfundaze,” esho. Uthi le nkampani yasayina isivumelwano sokusebenza ngokubambisana nomnyango wezolimo.
“Lolu hlelo lokufunda luqhutshwa yisouth African Sugarcane Research Institute, lubizwa ngokuthi yisenior Certificate Course in Sugarcane Agriculture.
“Ngaphezu kwalokhu, itongaat Hulett iphinde yenze izincomo zokuthi abafundi abanemifundaze baphinde bahlelelwe amathuba okuthi kukhuliswe amakhono abo ngaphakathi enkampanini. Kulo nyaka le nkampani uthi izibophezele ekwemukeleni nasekuqeqesheni abafundi abayisithupha ababizwa ngama-agricultural Interns.
Lolo hlelo luyingxenye yesivumelwano itongaat Hulett enaso ne-agriseta. Phambilini itongaat Hulett ike yabeka eceleni imali elinganiselwa ku-r8 million ukuze kusungulwe uhlelo lokukhiqiza imbewu yomoba isebenzisana ne-owen Sithole College of Agriculture.