Ucela usizo umndeni wobelethe amawele 'emuva kokudlwengulwa'
Kuvele ukuthi isisulu esingunina wamawele esinesifo sokuwa sinanomdlavuza
USIZI luzwa olunye emndenini wakwa-l, emlazi, indodakazi yakhona ephila nesifo sokuwa enukubezwe yakhulelwa amawele, nokuthe uma isiyobeletha, yathola ukuthi inomdlavuza wesibeletho.
Lo mndeni uthi kawazi ukuthi uzothathani uhlanganise nani njengoba uphila ngokucela komakhelwane, kodwa futhi uthi kawufuni ukuthi izingane zithathwe ngosonhlalakahle, ziyogcinwa kwenye indawo njengoba nawo ungenayo indawo eqondile yokuhlala.
Unkz Nokuthula Shozi (42), okungelona igama lakhe langempela, uthi isigameko sokunukubezwa kwendodakazi yakhe senzeke ngonyaka odlule, uze wabona isinezinyanga ezine ikhulelwe, kuthe eseyiyisa esibhedlela kwatholakala ukuthi ikhulelwe amawele.
Indodakazi yakhe ineminyaka ewu-18, igama layo ligodliwe ukuyivikela.
Uthi kusenzima ukuthi iwamukele amawele njengoba ingawafuni eduze kwayo.
“Ngiyakuqonda ukuthi ihlukumezekile ngoba le nto eyayehlela, nami yangehlela kodwa ngeke ngivume ukuthi osonhlalakahle bathathe abazukulu bami ngoba ngiyabathanda futhi ngiyazi ukuthi naye ekuhambeni kwesikhathi izingane zakhe uzogcina ezithanda,” kusho unina.
Ngokwemithombo yaleli phephandaba, unkz Shozi unikele esiteshini samaphoyisa esisesigcemeni sakwabb, ibhekithemba, eyocelela abazukulu bakhe ubisi namanabukeni.
Eziphendulela kulokho uthi, uye esiteshini samaphoyisa ngoba engazi ukuthi uzothathani ayihlanganise nani njengoba engasebenzi.
Uthi bobabili nendodakazi yakhe
banesifo sokuwa, bebehola impesheni yokugula esavalekile okwamanje.
Uthi okunye okugulise kwahlukumeza kakhulu indodakazi yakhe wukudedelwa komsolwa owaboshwa ngemuva kokubikwa kwesigameko.
“Sibe nokusatshiswa okuphoqe ukuthi sihambe sihlala ngoba sisabela impilo yethu.
“Izingane zibelethwe ngomhla ka-8 kumasingana (January), ngokuqhubeka kwesikhathi kwabonakala ngomthungo ungapholi, okuthe uma kubhekwa kwatholakala ukuthi indodakazi inomdlavuza wesibeletho, osuku-stage 4.
“Lokhu kutholwe yisibhedlela igreys Hospital lapho yabelethela khona, nokuyilapho elashelwa khona isifo sokuwa,” kusho yena.
Uthi inkinga enkulu, indodakazi yakhe beyingakwazi ukubhalisela imali yesibonelelo ngoba beyingenawo umazisi kodwa sebekulungisile lokho.
“Manje inkinga enkulu esinayo ukuthi ngomhla ka-22 kwephezulu kumele siyobona udokotela ozovuselela impesheni yethu yokugula, nemali yokugibela kasinayo. Siyile kosonhlalakahle siyocela usizo, basitshela ukuthi kakukho ukudla okukhona abangasisiza ngakho, basidlulisela enhlanganweni ebizwa ngokuthi yimbalencane
Childline, efike yasitshela ukuthi kufanele bathathe izingane nokuyinto esingayivumanga,” esho.
Uthi uncamela ukuwa evuka nabazukulu bakhe ngoba naye izingane zakhe ezintathu, uzikhulise kanzima.
“Ngale kokuthi ngizimisele ngokuwa ngivuka nabazukulu bami, sesiyabathanda ngoba sebeyingxenye yempilo yethu,” kusho yena.
Uthi usuku nosuku ukuze badle kumele aphume ayocela usizo komakhelwane.
“Kuyimanje ubisi ezinalo silunikwe ngamaphoyisa asebhekithemba, nalo ngolwezingane esezikhulile ezinonyaka ngoba njengoba kutholakale ukuthi unina unomdlavuza nje, akakwazi ukuzincelisa, namanabukeni siwanikelelwe yiwo amaphoyisa,” kusho yena.
Okhulumela umnyango wezokuthuthukiswa komphakathi Kwazulu-natal umnu Mhlaba Memela, uthe unkz Shozi kumele axhumane nosonhlalakahle okuyibo abazokwazi ukumlekelela.
“Osonhlalakahle bakhonela ukusiza ezimweni ezinjengalezo, ngakho-ke kubalulekile ukuthi angahambeli kude nabo,” kusho umemela.
Umnu Bheki Mngwengwe oyikhansela lakuwadi-83 emlazi , uthe uyalwazi udaba lwalo mndeni, ushayelwe ucingo ngumphathi womtholampilo osesigcemeni sakwa-l, embikela ngalo.
“Ngizwile nokuthi kabanayo nendawo yokuhlala, udaba lwabo sizolusukumela. Njengoba bexoshwa nalapho behlala khona, ngizobakhokhela imali ye-rent ukuze baqhubeke nokukhosela, sisayilungisa indaba yabo,” kusho umngwe-ngwe.