Ubizwe ngeqhawe usonhlalakahle oshonele emsebenzini
UCHAZWE njengesosha elifele emsebenzini walo usonhlalakahle odlule emhlabeni ngasekuqaleni kwesonto, ezama ukutholela usizo ingane okuthiwa ilahlwe wumndeni wayo kanti uzoba sengozini yemoto, ashone. Ingane abeyizamela usizo nozakwabo abehamba nabo basinda.
Ngokuthola kwaleli phephandaba unkz Dudu Zulu (45), obengusonhlalakahle endaweni yasegodlwayo, ophongolo, ubeqhuba umsebenzi wakhe ngemuva kwesigameko esiphuthumayo ebesidinga usizo losonhlalakahle esibhedlela itshelejuba esingaphansi kwesifunda izululand.
Ngokusho kukamfowabo, umnu Lindelani Zulu, bathole umbiko wokuthi udadewabo, ubehamba nengane beyoyitholela usizo nomunye wozakwabo, okuthe uma bephakathi kwevryheid nedumbe, baba sengozini yemoto, kwashona yena.
“Sithole umbiko wokuthi ushone ngemuva kwengozi yemoto, kasazi ukuthi yini eholele engozini kodwa ingane abebezama ukuyitholela usizo nomunye wozakwabo basindile. Siphatheke kabi njengomndeni ngokudlula kwakhe emhlabeni, washiya abantwana bakhe ababili kodwa futhi siyaqonda ukuthi ingozi yinto engeke igwemeke uma isifikile,” kusho umfowabo.
Uthi udadewabo udlula emhlabeni nje, ngenyanga edlule ubesanda kubungaza usuku lwakhe lokuzalwa ehlanganisa iminyaka ewu-45.
“Ubewuthanda umsebenzi wakhe ngendlela eyisimanga, beyingakapheli iminyaka emine ebuyile ukuzosebenzela ngasekhaya njengoba ebesenzela egoli. Ukhethe ukubuya azosebenza lapha ophongolo ukuze abe seduze nomndeni wakhe nabantwana bakhe ababili,” kusho yena.
Ungqongqoshe womnyango wezokuthuthukiswa komphakathi Kwazulu-natal, unkk Nonhlanhla Khoza, udlulise amazwi okukhalisana nomndeni wakwazulu, wathi unkz Zulu ungomunye wosonhlalakahle abebewuthanda kakhulu umsebenzi wabo. “Osonhlalakahle badlala indima ebalulekile emiphakathini njengoba kunezimo ezinzima okumele babhekane nazo.
“Unkz Zulu udlule emhlabeni ezama ukusiza ingane ebingaphansi kwesimo esingesihle njengoba beyilahliwe, ngakho-ke bona bebeyiyisa lapho izogcinwa khona iphephile. Kubuhlungu ukuthi behlelwe yilo mshophi benza umsebenzi wabo,” kusho unkk Khoza. Uqhube wathi unkz Zulu uyohlale ekhunjulwa ngobuqhawe bakhe njengoba eshonele emsebenzini nje, ubesebenza ebeka impilo yabanye abantu phambili.
“Omunye uzakwabo abebehamba naye nengane baphuthunyiswe esibhedlela, sinethemba lokuthi bazolulama ngokukhulu ukushesha.
“Sizoqhubeka nokukhumbula nokuhlonipha amaqhawe ethu ngokusebenza ngokuzikhandla, siqhubeke lapho begcine khona,” kusho yena.
Unkz Zulu uzofihlwa namhlanje ngomgqibelo endaweni yasebelgrade, khona ophololo.