UKUVULWA KWEPAKI YASESHAKA MARINE KULELE EZISEBENZINI EZISESITELEKENI
SESINGENELE esontweni lesihlanu isiteleka sezisebenzi zepaki yobumnandi ethekwini, Ushaka Marine World.
Lezi zisebenzi ezingaphansi kwesouth African Municipal Workers’ Union (Samwu) zikhala ngokuholelwa imali encane kunaleyo ebhalwe embikweni wamaholo ezisebenzi owashicilelwa ngo-2016. Ngeledlule
labika ukuthi unobhala wesamwu ethekwini, umnu Xolani Dube, wathi kusenamathuba amaningi okuthi lesi siteleka siqhubeke njengoba izisebenzi ezisesitelekeni zakubeka kwacaca ukuthi zizosebenza uma zizoholelwa kuhanjiswa ngokombiko wango-2016.
Waveza ukuthi iziphathimandla zaseshaka zibabikele ukuthi kunenkampani ezocubungula lo mbiko ngaphambi kokuwusebenzisa, okungathatha izinyanga ezimbili ngaphambi kokubuya kwempendulo.
Leli phephandaba lixoxe nomnu Ndabezitha Khoza, oyisikhulu esiphezulu eshaka Marine, okuqinisekisile ukuthi impendulo yokucutshungulwa kombiko izothatha izinyangana ngaphambi kokuba ibuye.
Uthi okwenza bafune kucutshungulwe lo mbiko, yingoba uqhathanisa ipaki nezinkampani ezinkulu ezakhele itheku. Uthi ukuvulwa kweshaka kusezandleni zezisebenzi.
“Impendulo yocwaningo lwalo mbiko ingabuya ezinyangeni ezimbili kuya kwezine. Nokho-ke zikhona iziphakamiso esizenzele izisebenzi ezithinta amaholo, esethemba ukuthi sizofinyelela esivumelwaneni esithile, kuqhubeke ukusebenza ngesikhathi sisalinde impendulo.
“Sifuna kutholakale ukuthi ngabe izisebenzi zikhokhelwa ngokuyikho yini ngoba kulo mbiko ka-2016, izisebenzi zethu ziqhathaniswa nezenza umsebenzi ofanayo kwa-unilever, kwatongaat Hullets nezinye izinkampani.
“Thina-ke siyipaki, kasiyona inkampani, yingakho sikholwa wukuthi sizikhokhela ngendlela efanele,” kusho ukhoza.
Utshele leli phephandaba ukuthi uyakuqonda ukuthi amabhizinisi aqashe ngaphansi kwendawo yabo, abhekene nenkinga njengoba imali ingangeni (kutelekiwe). Uthi babe nesivumelwano sokuthi
avale ukuze angalinyalelwa yimpahla ngesikhathi kuqhubeka isiteleka.
Uzwakalise ukukhathazeka ngokungaholi kwezisebenzi eziyingxenye yesiteleka.
“Iziqashi zethu sakhuluma nazo, sazitshela ukuthi zingabuki ngeso lokulahlekelwa yimali kulesi sikhashana ngoba mkhulu umonakalo ongenzeka uma zivula, zakuqonda lokho, zavuma ukuvala.
“Izisebenzi zethu siyazi zinezidingo eziningi kodwa akukho ebesingakwenza ngale kokusebenzisa umthetho othi, ongasebenzanga akaholi.
“Siyathemba sizofika esivumelwaneni esithile nenyunyana ukuze kuqhubeke umsebenzi,” kuphetha ukhoza.