Usuqoqwa amaphara udoti emigwaqweni yasethekwini
Umasipala uthe uyawulungisa umonakalo odalekile
USUQOQWA ngamaphara udoti edolobheni lasethekwini asebenza ebusuku kumasipala wetheku ukuzama ukulawula isimo sokungcola okuxhaphake edolobheni.
Leli phephandaba lizibonele amaphara eqoqa udoti ethekwini njengoba izisebenzi zikamasipala ezithutha imfucuza seziteleke amasonto amabili, zifuna ukunyuselwa amaholo.
Amaphara enza lo msebenzi ebusuku egadwe ngamaphoyisa kamasipala, bese izimoto zikadoti ziwuthutha. Okuqaphelekile wukuthi lokhu akwenzeki kuzona zonke izingxenye zedolobha.
Elinye lamaphara elixoxe naleli phephandaba, lithe akhokhelwa imadlana ngokwenza lo msebenzi. Liveze ukuthi nalo kalikuthandi lokhu elikwenzayo ngoba laba abatelekile nabo banezizathu eziphathekayo.
“Siyasebenza ebusuku bese besinikeza imadlala encane laba bakamasipala. Sisebenza ngazo izikhathi zasebusuku ngoba lokhu esikwenzayo kungasibulalisa kulaba abatelekile,” kusho lona.
Ngesikhathi eqoqa udoti amaphara, izimoto ezithutha udoti namaphoyisa ayagada ukuthi akekho owaphazamisayo.
Ukuteleka kwezisebenzi sekudale umonakalo omkhulu ethekwini njengoba kweminye imigwaqo okubalwa kuyona ist Georges, izibungu sezihamba emigwaqweni.
ILANGA Lempelasonto lithumelele umasipala imibuzo, libuza kabanzi ngokusebenza kwamaphara aqoqa udoti edolobheni lasethekwini. Okhulumela umasipala wetheku unkz Luthando Ngubane, akawuphendulanga umbuzo mayelana nalolu daba. Uveze ngesitatimende ukuthi imikhankaso yokukhuculula itheku iyaqhubeka edolobheni.
“Umasipala uyaqhubeka nokulungisa umonakalo odalwe yilesi siteleka okuhlanganisa ukukhucululwa kwemigwaqo. Siyakuqonda ukuthi ukuphepha kwabenza lokho kubalulekile, yingakho abakwenzayo bephelezelwa ngamaphoyisa.
“Siyacela abahlali babambisane nomasipala ukuze isimo sisheshe sibuyele kwesejwayelekile. Siyaxolisa nakosomabhizinisi abakhahlanyezwe yile nkinga kadoti,” kusho unkz Ngubane.
Lesi siteleka saqala ngenyanga edlule emuva komhlangano wesouth African Municipal Workers’
Union, okwakuzodingidwa kuwo izikhalo zezisebenzi.
Kuthiwa kulo mhlangano abaholi bale nyunyana esifundeni setheku, batshela amalungu ayo ukuthi ziholelwa amakinati uma ziqhathaniswa nezisebenzi zakwabanye omasipala bamadolobha amakhulu.
Izisebenzi zavala imigwaqo ngemigqomo kadoti evuthayo, zawusaphaza zase zivimba nangezimoto zikamasipala.
Umasipala wetheku waveza ngesitatimende ukuthi izisebenzi ezitelekile kazikaze zizilethe izikhalo zazo ngaphandle kwephepha elibhalwa amaholo aholwa yizisebenzi zikamasipala wasekurhuleni.
Isiteleka sisaqhubeka nakuba sachithwa yinkantolo enkulu yasethekwini ngolwesine olwedlule. mthobisis@ilanganews.co.za