I-COSATU IXWAYISA IZISEBENZI EZITELEKILE NGOKUSETSHENZISWA NGOSOPOLITIKI
I-CONGRESS of South African Trade Union (Cosatu) ikhathazekile ngezinsolo zenhlese yepolitiki, okusolwa abathile ngokuqhuba ngamadolo izisebenzi zikamasipala wetheku ezingaphansi kwedurban Solid Waste (DSW) eseziqede amasonto amabili zitelekile.
Lokhu kuvezwe ngunobhala wecosatu Kwazulu-natal, umnu Edwin Mkhize, obephawula ngesiteleka esiqhutshwa yizisebenzi ezingaphansi kwesouth African Municipal Workers’ Union (Samwu) edla ogqokweni lunye necosatu.
Umkhize utshele leli phephandaba ukuthi icosatu izwile ukuthi kunosopolitiki abathile abafisa ukufeza izinhloso zabo ngalesi siteleka njengoba sekusondele ukhetho.
“Siyazizwa izinkulumo ezithi lesi siteleka sinenhlese yepolitiki phakathi. Abanye babo bafuna ‘ukusintshontsha’. Uma lezi zinsolo ziyiqiniso, ngixwayisa izisebenzi ukuthi zingaweli kulolo gibe lwabantu abafuna ukuzuza okuthile ngazo.
“Sizokwenza imizamo yokuthi osomathuba bangasebenzisi izimfuno zalezi zisebenzi ukuthola abakufunayo,” kusho umkhize.
Uthi icosatu ikhathazekile ngokuqhubeka kwalesi siteleka njengoba siphazamisa okuningi, kodwa izoqhubeka nokweseka isamwu emkhankasweni wokulwela amalungelo ezisebenzi.
Ngolwesine umasipala wetheku uveze ukuthi sewuqalile ukuthathela izinyathelo laba abayingxenye yalesi siteleka.
Okhulumela lo masipala unkk Gugu Sisilana, uthe sekunikwe isaziso sezinsuku ezilishumi izisebenzi eziwu-79 eziyingxenye yesiteleka, kwamiswa ezinye eziwu-20.
“Lezi zisebenzi zinikwe izinsuku ezilishumi ukuba zilethe izizathu zokuthi kungani kungamele zixoshwe. Lokhu sikwenze ngokulandela yonke imithetho njengoba nenyunyana yazo sayinika amahora awu-48 ukuziyalela ukuba zibuyele emsebenzini ngemuva kwesinqumo senkantolo, esathi lesi siteleka kasikho emthethweni,” kusho unkk Sisilana.
Unkk Sisilana uthi umasipala uyaxolisa ngokuphazamiseka kokuthuthwa kwezidingo zomphakathi, wacela ukuba izakhamizi zibambisane nawo kuze kudlule lesi simo.
Uthi seyiqalile imizamo yokubuyisela isimo kwesejwayelekile. Ucele izakhamizi ukuqhubeka nokugcina udoti emagcekeni azo.
“Siyakuqonda ukuthi eminye imiphakathi ihlukumezekile njengoba ingenamanzi nagesi. Kuleyo elinyalelwe yingqalasizinda yamanzi, sithumele izimoto ukuba zihambise amanzi njengoba sisaqhubeka nokuyilungisa.
“Siyacela abantu basibikele ngengqalasizinda elimele ukuze sithumele ithimba elizoyilungisa njengoba eseqalile ukusebenza ngaphansi kweso lonogada namaphoyisa amathimba kamasipala,” esho.