Qoka ngokucophelela okumele bahlomule empeshenini yakho
KWEXWAYISWA izisebenzi ukuba zingasebenzisi imizwa uma ziqoka abantu abazohlomula esikhwameni sazo sempesheni uma zona sezendele koyisemkhulu.
Lesi sexwayiso sikhishwe ngunkk Sinenhlanhla Mthembu wegina Mthembu Incorporated Attorneys - osebenzela ejozini othi lesi yisinqumo esibalulekile esingaba nomthelela kwabasele.
Uthi umnikazi wefa angaqoka oyedwa noma ngaphezulu kwabazohlomula ephesentini nephesenti asuke elibhalile.
“Inhloso yokuba nesikhwama sempesheni wukuthi labo abathembele kuwena (dependants) bangahlupheki uma ungasekho emhlabeni. Lokho kubala ngisho nabazali, inqobo uma bebencike kuwena ngokwemali,” esho.
Uthi ngebhadi, kuyenzeka umzali axabane nengane bese eqoka ukuyikhipha ebantwini abazohlomula efeni lakhe.
Uthi ukuxabana nengane kakusho ukuthi kayisewona umthwalo wakho.
“Kokunye uthola ukuthi umuntu uxabene nenkosikazi bese eqoka ukuthi uzoyikhipha emafeni. Kakuhambi kanjalo.
“Uma ugcwalisa amafomu okuqoka abantu abazohlomula emalini yakho, ungayisebenzisi imizwa.” kusho unkk Mthembu.
Uthi kuba yibhodi elengamele isikhwama sempesheni elinqumayo ukuthi imali yongasekho izohlukaniswa kanjani phakathi kwezingane zakho nalabo osuke ubaqokile.
Ibhodi libheka ukuthi ngobani abathembele kuwena, nokuthi uqoke bani, bese linquma ukuthi lizoyikhokha kanjani imali.
“Lisuke lizolandela izifiso zakho ngendlela obhale ngayo. Kepha uma kutholakala ukuthi kukhona abebethembele kuwena kodwa obashiyile, lenza uphenyo ukuze nabo bahlomule.
“Isibonelo, lokhu likwenza uma lithola ukuthi ushadelwe kepha wena uqoke ukufaka umakhwapheni,” kuqhuba unkk Mthembu.
Uncoma ukuthi uma “ungumakhwapheni” wazi ukuthi umufi ubenesikhwama sempesheni futhi unengane yakhe - kumele uziveze.
“Iphutha elenziwa ngabanye, wukuthi mhlawumbe umufi ushone ingane ingakazalwa, bese umuntu angaphumeli obala. Uma kuyingane kamufi, mayivezwe. Uma isizelwe kusuke kuzokwenziwa ucwaningo oludingekayo bese ifakwa ohlwini lwabahlomulayo,” esho.
Ebuzwa ukuthi njengoba sekwaba khona “imihlomulo yezinqandamathe” (girlfriend allowance), mangakanani amathuba okuthi intombi ingayokhala ithi beyithembele kumufi kwezemali, uthi uma inobufakazi obuphathekayo ngalokho, ingahlomula.
Unkk Mthembu uthi uma kuba noshintsho olubalulekile empilweni - mhlawumbe uma kukhona osezelwe, oseshonile noma sekunesehlukaniso - kuyicebo elihle ukulwenza lolo shintsho nasefomini labahlomulayo. tzondi@ilanganews.co.za www.ilanganews.co.za