Izingonyama esezabuza kwazisiza ukulalela izingwevu zisabusa
MHLELI: Abakwabiyela babengamaqhawe endulo, kuthangi, izolo nanamuhla baseyiwona. Inkulumo yenkosi ubhekizwe Biyela eyethule ondini muva nje, la bekubuthene khona amakhosi asengonyameni, ikhombise ubuqhawe, isibindi, ukuzidela, ukumela iqiniso nobunye.
Lobu buqhawe obahlukene babukhonjiswa ngokhokho bakhe ezingonyameni ezahlukene Kwazulu. Ingonyama yakwadukuza inkosi ushaka kasenzangakhona, yayibiza umenziwa kaxhoko wakwabiyela ngoyise wayo isibili.
Lokhu kwakudalwa wubuhlakani nobuqhawe bakhe nezeluleko eziphusile njengendoda eyayindala kunelembe.
Ilembe laze lamganisela ngodadewabo kanina omncane, lathi lifuna umuntu ozomtotosa ngoba wabe esekhulile. Lowo Mamhlongo wazala umhambi kwagobihlahla.
Ngesikhathi ilembe lilwa nenkosi uzwide kalanga Ndwandwe, empini eyaqala kwagqokli yadudulana yaze yayophosana elangwe, ethunzini yaze yayophelela phezu komhlathuze, kwakukhona umvundlana kamenziwa nabanye bakubo.
Inkosi usifiso Biyela yasemombeni ingumzukulwane weqhawe ugala kanodade wakwabiyela. Ugala nguyena owakhuza ilembe lishaya imithetho eqinile kudlule unina inkosazane unandi yasesibhambeni, intombi kambengi.
Lalithi makuzilwe kungayiwa emalawini, kungazalwa ngane ngalowo nyaka, kungalinywa, kungasengwa izinkomo neminye imithetho eyayisinda.
Ngugala owaqonda ilembe walitshela ukuthi imithetho eliyibekile izolambisa abantu balo bafe, bese libusa bani ngoba inkosi iyinkosi ngabantu.
Lalalela ilembe, lamncoma maqede lamxoshisa ngomhlambi wezinkomo.
Ngesikhathi ilembe lijaha inkosi usandanezwe Mpanza, lisuka nayo esigodlweni sayo emanyiseni enhla nemfolozi emnyama ngasentabeni intabankulu, okhukho, beze bezofika lapho ezihlangana khona izimfolozi, esiyembeni, laliyijaha inkosi yakwampanza lihamba neqhawe umagidi kamenziwa (ufasimba) lwakwabiyela, Kwasanguye.
Inkosi umkhombisi kadumezweni inqabayembube/ inqabayengonyama yakwabiyela ogelweni, obuka, yabe izalwa yisithole sesizwe umntwana unokusa kadabulamanzi kampande, ezulwini.
Yaqokwa yisilo umaphumzana kadinuzulu njengesekela likandunankulu wesizwe samazulu.
Bekuwumasingana (January) ngo2009 umdlokombana ebize amakhosi Kwalinduzulu, Kwanongoma.
Inkosi Phangifa Biyela yakwampukane, edlangubo, yatshela isilo emehlweni, yathi inxeba livulwe yiso isilo, siqhelile emakhosini nakundunankulu waso, yingakho kunje.
Yangenelela nenkosi Velemandleni yakwabiyela, kwasanguye. Udaba lwalunge“bhubesi lasenhlangwini” inkosi umelizwe Dlamini eseyakhothama, eyayidume ngokuqondisa ukotini. Yayilinyakazisa izwe, ingabhedile, isiwadlile amakhosi amaningi asogwini.
Sakhuzeka isilo, sezwa sabuyisana namakhosi njengoba sebuza sesiyimbumba namaduna aso.
Ibhavumulile-ke inkunz’ ebomvu kwezikamthiyaqhwa. Siyakholwa wukuthi izolalelwa njengengwevu endala. Okudlula lapho-ke kuyofana nokuthi kushaywe irobhothi elibomvu. Mangibonge mhleli.