Wemukelwe ngo-elethu othathe izintambo kwatransnet
Sekubhekwe inqubekela phambili kule nkampani yezokuthutha
IZINHLANGANO zosomabhizinisi zisishayele ihlombe isinqumo sokuqoka unkz Michelle Phillips (osesithombeni) abe yisikhulu esiphezulu kwatransnet. Lezi zinhlangano zithe zikubheke ngabomvu ukusebenza naye ngenxa yamagalelo anawo okuphatha le nkampani yezokuthutha.
Ungqongqoshe wamabhizinisi kahulumeni umnu Pravin Gordhan, umemezele isinqumo sokuqoka unk Phillips, obesenezinyanga eziyisithupha ebambile kulesi sikhundla.
Kuqokwe nesikhulu esiphezulu sezindaba zemali kule nkampani, unkz Nosipho Maphumulo.
BETHEMBA UKUTHI NOSOPOLITIKI BAZOSESEKA NGENDLELA EFANELE
Umnu Kganki Matabane, oyisikhulu esiphezulu seblack Business Council (BBC), uthe ukuqokwa kukankz Phillips nonkz Maphumulo kuzoletha ukuzinza kwatransnet futhi kuzolekelela kakhulu ukulungisa izinkinga zezokuthutha ezikhona eningizimu Afrika.
“Isikhulu esiphezulu sinamagalelo afanele futhi sethemba ukuthi osopolitiki bazoseseka ngendlela efanele. I-BBC izobeseka futhi izosebenzisana nabo,” kusho umatabane.
Udkt Juanita Maree wesouthern African Association of Freight Forwarders (SAAFF), uthe ukuqokwa kukankz Phillips nonkz Maphumulo kusho lukhulu nenqubekela phambili kule nkampani yezokuthutha.
AMAGALELO AKHE AZOSIZA UKWENZA OKUYIKHO ENDLELENI YOKUPHATHA IMALI KWA-TRANSNET
“Amagalelo kaphillips embonini asho lukhulu ngobuholi bakhe. Ukwazi njengoba ezazi ukusebenza kwetransnet. Ngisho nendlela okuthengwa ngayo izimpahla kusho ukuthi uzokwazi ukushintsha izinto ukuze kuphucuke ukusebenza nokuncintisana kwetransnet.
“Ukuzinikela kwakhe ekuqhamukeni nezinto ezintsha kuzoba mqoka ekubhekaneni nenkanankana yezinkinga zezokuthutha ezikhona, kugcine kukhule imboni yezohwebo nezokuthutha,” kusho udkt Maree.
Udkt umaree uthe nakuba unkz Maphumulo engakaze asebenze embonini yabo, kodwa kabangabazi ukuthi amagalelo akhe ekuphatheni imali nasekuphatheni izinkampani, kuzokuba mqoka ukuqinisekisa ukuthi inkampani yenza okuyikho endleleni ephatha ngayo imali.
BAYITHIMBA LABAHOLI OKUFANELE LIHOLELE I-TRANSNET EMPUMELELWENI
“Bobabili (unkz) Phillips no(nkz) Maphumulo bayithimba labaholi okufanele liholele itransnet empumelelweni. Ukuzinikela kwabo ukwenza umsebenzi oseqophelweni eliphezulu namagalelo abo okuphatha, kuletha ithemba kuzona zonke izinhlaka nezisebenzi,” kwengeza udkt umaree.
Unkz Busi Mavuso, oyisikhulu esiphezulu sebusiness Leadership South Africa, uthe kabangabazi ukuthi bazosebenzisana kahle nalezi zikhulu ezintsha.
“Unkz Phillips uyakwazi okuzanywa ngamabhizinisi nohulumeni ngokuhambisana kwezokuthutha ngebusiness for South Africa.
SIQALE NGOKUSEMTHETHWENI NESIKHULU ESIPHEZULU ESISHA KWA-ESKOM
“Ubebambile eyisikhulu esiphezulu ngesikhathi sinciphise isibalo semikhumbi esechwebeni lasethekwini ngo-45% futhi sinciphisa nesikhathi esilindwa yimikhumbi ngo-36%.
Ukukhethwa kwakhe ngokugcwele kuzoqinisa lokhu kusebenzisana futhi kuqhube nomgqigqo womsebenzi osuwenziwe.
“Siyameseka singosomabhizinisi futhi sikulungele ukumeseka ngayo yonke indlela,” kusho unkz Mavuso.
* Khonamanjalo, uqale ngokusemthethweni umnu Dan Marokane ukuba yisikhulu esiphezulu esisha kwa-eskom ngolwesihlanu.
Umarokane uyichemical Engineer, unemba futhi unemi-nyaka engaphezu kwewu-20 ephethe izikhundla ezehlukene zobuholi.
Okunye ngonkz uphillips: * Uneminyaka ewu-24 afika kwatransnet;
*Uke waba yisikhulu esiphezulu setransnet Pipelines;
* Uke waba yibamba lesikhulu esiphezulu etransnet Port
Terminals;
* Une-bjuris NE-LLB kwasenelson Mandela University;
* Wenza itransnet Woman in Operations Management Programme;
* Uke wenza iglobal Executive Development Leadership Programme egibs;
* Unezitifiketi ze-international Terminal Operations Management Programme zase-antwerp, erotterdam, eparis nasele Havre.
* Lolu daba luqale lwashicilelwa ku: www.umbele.co. za