Mabafundiswe ngamandla abampisholo ukutshala imali ezimakethe zamasheya
UMLAYEZO wokukhuthaza nokufundisa umphakathi ngamathuba okutshala imali ezimakethe zamasheya kusamele uqhubeke nokwenyusa igiya njengoba isibalo sabantu abansundu abatshala kule ndima sisesincane kakhulu.
Lokho kusho ukuthi ulwazi kalukafinyeleli kahle ebantwini ikakhulukazi abasha.
Kudala kwakujwayelwe ukumemezela uma kuzophuma amasheya ezinkampanini ezihweba ngaphansi kwejohannesburg Stocks Exchange (JSE) lapho amalungu omphakathi ayebhalisa ezindaweni ezifana naseposini ukuze akwazi ukuthenga amasheya.
Ubuchwepheshe besimanje sebuyithuthukise kakhulu imboni njengoba sekusebenza bona, okwenza kube lula ukuthenga nokutshala kumasheya usebenzisa ifoni.
IZIKOLE EZIZIMELE ZIYABAFUNDISA ABAFUNDI NGALEZI ZINDLELA ZOKUTSHALA IMALI
Okuhle wukuthi sewukwazi ngisho ukuthenga ucwezu noma ingxenye (fractional shares) yesheya ngisho ungenayo imali ephelele. Lokho kusho ukuthi uma isheya likhule ngamaphesenti ayisihlanu, nengxenye yakho izokhula kanjalo ngamaphasenti ayisihlanu.
Okwenza ukuthi ngiphinde ngiluvakashele lolu daba, yingoba izikole ezizimele ziyabafundisa abafundi ngalezi zindlela, okwenza ukuthi baphumelele ekuphathweni kwemali ngisho sebeqedile ezikoleni. Okuhle wukuthi abazali bangakwazi ukuthengela izingane amasheya okuyosiza uma sezikhulile futhi sezidinga imali yamabanga emfundo ephakeme.
UBUCHWEPHESHE BESIMANJE BENZA SIKWAZI NOKUTSHALA EMAZWENI ANGAPHANDLE
Njengoba ubuchwepheshe besimanje benza impilo ibe lula kakhulu, usuyakwazi ukuthenga amasheya asemazweni angaphandle njengasemelika, engilandi, echina nasezwenikazi i-europe. Sesiyakwazi ukutshala kalula emazweni angaphandle ngokusebenzisa ubuchwepheshe besimanje, okuvula amathuba amaningi okuphumelela emkhakheni wokuthenga amasheya.
Uma ukwazi ukusebenzisa imali engango-r4 000 ngenyanga ngokuthenga ukudla ezitolo ezifana noshoprite, epick n Pay nasespar, kungani ungathengi namasheya akhona ngoba phela usebenzisa imali engaphezulu kuka-r40 000 ngonyaka uthenga ukudla?
LEZI ZIMBONI ZINGASISIZA KAKHULU NGAPHANSI KOHLELO LWESIKHATHI ESIDE
Uma ungumuntu ophuzayo, ngiyakukhuthaza ukuba uthenge phela namasheya ezindaweni ezifana noheineken no-ab Inbev ephethe ISAB. Izimboni zezimoto, ezezindlu, izakhiwo nezinxanxathela zezitolo zinamathuba amaningi okutshala ngokuthenga amasheya ngokohlelo lwesikhathi eside.
Izinto esizisebenzisa njalo futhi esizikhokhela imali ngoba ziyingxenye yokuphila njengokudla, izimoto, izimpahla, izingubo zokugqoka, izindlu, ubuchwepheshe besimanje nezimboni zezimbiwa phansi zingezinye ezingasisiza kakhulu ngaphansi kohlelo lwesikhathi eside.
UKUTSHALA KUMASHEYA KUDINGEKA UZINIKE ISIKHATHI ESIDE UWALONDOLOZILE
Khumbula ukuthi ukutshala kumasheya kudingeka uzinike isikhathi eside uwalondolozile, kodwa okuhle wukuthi uthola nemihlomulo efana nama-dividends atholakala njalo ngonyaka kwezinye izinkampani.
Akhona amasheya esikhathi esifushane, abizwa ngokuthi ngamapennystocks, bese kuthi awohlelo lwesikhathi eside abizwa ngokuthi ngama-bluechip stocks.
Kukhona namasheya ahlanganisiwe njengeqoqo elilodwa esiwabiza ngokuthi ngama-index Funds adume ngokubizwa ngamaexchange Traded Funds (ETFS) eningizimu Afrika.
Nawo futhi ayahlomulisa ngoba ayinhlanganisela yamasheya. Amanye abizwa ngokuthi ngamareal Estate Investment Trusts (REITS) abhekene nezezindlu.
Masifunde ukutshala ezinkampanini ezenza imali ngathi, singabi ngabathengi kuphela, kodwa sitshale ukuze sihlomule.
Usiboniso Mtshali ungusomabhizinisi ongumeluleki wezindaba zemali osemthethweni (FSP49257), ogunyaziwe ukusiza abasezikweletini (NCRDC3326), ukudayisa nokuthengiswa kwemizi (FFC: 1197883) nokwakha izindlu (NHBRC3000286136). Email: admin@moneyrepublic.co. za.
Whatsapp: 076 810 0953.