Ufisa ukuvakashela iziqiwi ayobona amabhubesi

Owerichards Bay FC ukhule ezidlalela izimoto zocingo

Ukunobhutshuzwayo wakuleli untlonelo

Bomelo ongumdlali osemncane werichards Bay FC egijima kwidstv Premiership.

Ubomela udabuka e-eastern Cape kanti wazalwa ngomhla ka-28 kumandulo (September) ngo-2005. Ufunde emthontsasa nasebukazi Primary School, wadlulela ekwenzokuhle Secondary wagcina e-african Vision Secondary School.

Uqale ukudlala unobhutshuzwayo esesemabangeni aphansi okuyilapho ethi uthando lwawo lwamngena khona njengoba bekunzima ukuthi umehlukanise nalo mdlalo azifela ngawo.

Udlalele amankentshane neking Movers kanti womabili la makilabhu ngawangakubo ngaphambi kokujoyina idurban Academy ahlale kuyona isikhashana wabe esedlulela kwi-ethekwini Coastal.

Uthi ngeke amkhohlwe ulindani “Mantayi” Shezi owaba wusizo olukhulu endleleni yakhe njengoba ebemgqugquzela ukusebenza kanzima. Inatal Rich Boyz yambona ngesikhathi bedlala umdlalo wobungani neqembu elincane, yamthatha khona lapho.

Kuyimanje lo mdlali - obuye agijime naseqenjini lebay elikwidstv Diski Challenge ukuze ahlale esesimeni esikahle ulokhu eqhubeka nokuhlohla amagoli okuyikhona okwenze izikhulu zale kilabhu zamkhuphulela esikimini esikhulu nabanye ozakwabo uthandoluhle Gazu, usiphesihle Buthelezi nosanele Zulu.

Ingxoxo kabomela NELANGA Lempelasonto (I/L) ngempilo yakhe yangaphandle kwenkundla ihambe kanje:

I/L: Ungumuntu onjani?

Bomela: Ngizithobile, ngihlale ngifuna ukufunda okusha ngaso sonke isikhathi. Yingakho ngihlale ngizisondeza kubantu ukuze ngifunde lukhulu kubona. Ukudlala ibhola kungisiza kakhulu ngoba kungifundisa izindlela eziningi zokuphila.

I/L: Ufike kanjani ebholeni elikhokhelayo?

Bomela: Ngicabanga ukuthi ukuzimisela kwengikwenzayo yikhona okube neqhaza elikhulu ekutheni ngize ngifike la ngikhona njengamanje. Ukwesekwa engikuthole ekhaya nakho kungisize kakhulu ngoba kukho konke ebengikwenza bengazi ukuthi kukhona abantu abangemuva kwami abangifisela okuhle.

Ukuhlangana nomuntu ofana nolindani Shezi kungenye yezinto ezangisiza kakhulu. Ngikhumbula ngesikhathi kuthiwa mangidlale nabantu abadala kunami, ngangize ngisenge ezimithiyo ngithi ngilimele ngenxa yokwesaba kodwa ngokuhamba kwesikhathi ngathola isibindi ngagcina sengidlala njalo okwangelekelela kakhulu ngoba kwakungenza ngingesabi noma ngabe sidlala kuphi.

I/L: Uphuma emndenini onjani?

Bomela: Ngiphuma ekhaya elikahle noma lingenakho konke kodwa osisi bami benza umsebenzi oncomekayo ukusigcina sijabulile.

I/L: Ikuphi okhule ukwenza ebusheni bakho emakhaya?

Bomela: Kakukuningi engikhule ngikwenza ngaphandle kokuzidlalela izimoto zocingo nokubhukuda emfuleni.

I/L: Uthanda hlobo luni lwemoto?

Bomela: Kangikazi, okwamanje ngisajabulela zonke ezinhle engizibonayo. Mhlawumbe uma sengithole amandla sengingaqala ngikhethe ukuthi iyiphi engahambelana

nami.

I/L: Yibaphi abadlali okhule uzifela ngabo kuleli naphesheya kwezilwandle?

Bomela: Kuleli ngithanda ukhanyiso Mayo wecape Town City kanti phesheya kwezilwandle ngizifela ngocristiano Ronaldo waseportugal.

I/L: Ukhule ulandela yiphi ikilabhu?

Bomela: Ngikhule ngizifela ngekaizer Chiefs kuleli nemanchester

United yaseengland.

I/L: Yiluphi uhlelo lukamabonakude olukhonzile?

Bomela: Kayikho into engiyibuka kumabonakude ngaphandle kukanobhutshuzwayo.

I/L: Uyakwazi ukupheka?

Bomela: Ngiyinkunzi uma kuziwa ngalapho, ekhaya ngafundiswa kakhulu ukubeka izimbiza, ungathi babazi ukuthi ngiyohlala ngedwa ngelinye ilanga.

I/L: Ukhonze hloboni yokudla?

Bomela: Kangiyena umuntu okhetha ukudla, ngidla noma yikuphi okusuke kukhona.

I/L: Yimuphi umbala owukhonzile?

Bomela: Ngithanda omhlophe nomnyama, kodwa neminye ngiyayifaka. I/L: Uzibona ukuphi eminyakeni emihlanu ezayo?

Bomela: Ngifisa ukwelekelela ikilabhu yenze kahle, ngiyibonge ngokunginika ithuba bese ngilwela ukwenza kahle ukuze ngizothola nethuba lokuyodlala phesheya kwezilwandle kwazise yisifiso sawo wonke umdlali ukuzibona egijima emaligini amakhulu ase-europe.

I/L: Ukhona ezinkundleni zokuxhumana?

Bomela: Yebo ngikhona kodwa kangimningi kakhulu, ngiyaye ngingene nje ngaleso sikhathi uma ngithole ithuba nakhona, ikakhulukazi kwifacebook.

I/L: Iliphi izwe ongathanda ukulivakashela phesheya kwezilwandle uma uthola ithuba?

Bomela: Ngifisa ukuvakasha eportugal, ngiyazifela ngezindawo zakhona.

I/L: Ungabeluleka uthini ontanga yakho abasafuna ukuvelela kunobhutshuzwayo?

Bomela: Kakukho okwedlula ukuzimisela nokulalela. Ngingumuntu okholwa wukuthi kakukho okungeke kwenzeka uma uzimisela. Ngiyafisa ukubona intsha yangakithi enekhono kunobhutshuzwayo igijima kwidstv Premiership ngoba ngiyakholelwa ekutheni ithalente likhona, yikho nje ukuthi libuye lingavundululwa kahle okwenza abanye bagcine sebephonsa ithawula.

I/L: Isiphi isilwane osithandayo nosesabayo?

Bomela: Kangiyena umuntu ogxile kakhulu ezilwaneni kodwa ngiyafisa ukuvakashela isiqiwi ngiyobona izilwane zakhona ikakhulukazi amabhubesi.

UMDLALI webay FC untlomelo Bomela kanti esithombeni esikwesobunxele ngucristiano Ronaldo waseportugal azifelayo ngaye. UNTLOMELO Bomela webay FC enomkhulisi kanti esithombeni esikwesokudla ngodadewabo u-aphelele noyandisa.