ABHEKENE NOMQANSA AWASE-KZN AGIJIMA KWI-MFC
ABHEKENE nomqansa amakilabhu akwazulu-natal agijima kwimotsepe Foundation Championship (MFC) njengoba eqhathwe namakilabhu angabhenywa kulesi sigaba namuhla ngomgqibelo ezinkundleni ezahlukene.
Imaritzburg United izovovana inkani ne-orbit College - emise kabi imagesi FC esicongweni SEMFC - namuhla ngo-15h30 e-olympia Park.
Lo mdlalo ubukeka unzima kwiteam of Choice njengoba isazama ukuhlangana kahle.
Ngakolunye uhlangothi, imilford FC - ebhabhadiswe yihungry Lions ngo-3-1 isekhaya ngeledlule - izobhekana NEJDR Stars esazikhotha amanxeba ngemuva kokushayelwa ekhaya yi-upington City ngeledlule. Lo mdlalo unamuhla ngo-15h30 esoshanguve Stadium, epitoli.
Khonamanjalo, udan “Dance” Malesela ocija ibaroka FC, ukhala ngokudlaliswa ngonondweba abangenalo ulwazi lwalo msebenzi kulesi sigaba. Uthi umincele ukuthi banikwe ozokwazi ukushaya kahle indweba uma sebebhekene nevenda FC kusasa ngesonto ngo-15h30 eglobal Stadium.
“Ipremier Soccer League (PSL) kufanele iyibheke indaba yemidlalo esiyidlalayo ngoba bonke abantu bayakhala ngesimo esikhona.
“Ngikholwa wukuthi abadlali bami bazokwazi ukulwa ukuze sibuye namaphuzu agcwele kwivenda FC,” kusho umalesela.
Uduncan Lechesa ocija ivenda FC, uthi usalwa nemiqondo yabadlali njengoba isimo singahambi kahle kubona.
Uzama inhlanhla kwiplatinum City Rovers unkanyiso Zungu wodumo kwi-orlando Pirates.
Isiyonke imidlalo YEMFC engempelasonto imi kanje:
NAMUHLA
Ethohoyandou: Black Leopards vs Magesi FC 15h30.
E-olympia Park: Orbit College vs Maritzburg United 15h30.
Esoshanguve Stadium: JDR Stars vs Milford FC 15h30.
E-isak Steyl: Platinum City Rovers vs Pretoria Callies 15h30.
Egiyani Stadium: Casric Stars vs NB La Masia 15h30.
Emxolisi Dicksy Stadium: Upington City vs Marumo Gallants 15h30.
KUSASA
Eglobal Stadium: Baroka FC vs Venda FC 15h30.