Sithembisa lukhulu isilomo sesundowns
Umshishi uzobonakala okokuqala edlala kuleli emuva kwe-afcon
SENZO SOKHELA
SITHEMBISA lukhulu isilomo semamelodi Sundowns, uthemba “Mshishi” Zwane, okusabhekwe lukhulu kusona ngale sizini.
Idowns izokhiphana inkani nechippa United kowedstv Premiership namuhla ngomgqibelo ngo-20h00 elucas Moripe Stadium, e-atteridgeville.
Idowns bekufanele ibhekane nets Galaxy koweligi ngolwesithathu ebusuku embombela Stadium, empumalanga kodwa lo mdlalo wahlehliswa emuva kokuba ibhasi legalaxy libe sengozini yomgwaqo, kwashona umuntu wesifazane.
Idowns ithole ithuba lokuphumula kwazise inoxhaxha lwemidlalo njengoba ibuye igijime neyecaf Champions League.
Uzwane ekhuluma okokuqala ngqa nabezindaba emuva kokuba ebuye kwi-africa Cup of Nations (Afcon) esongwe ngenyanga edlule e-ivory Coast, uthembise lukhulu njengoba ezakhe zibuyela ensimini.
“Ngijabule njengoba sengibuyile eqenjini, konke kuhamba kahle, imimoya iphezulu ekhempini, bonke abantu baqatha, bafuna ukudlala.
“Sonke siyazi ukuthi yini esifuna ukuyizuza njengekilabhu. “Siyikilabhu ejabulile, sikulangazelele ukudlala senze lokhu esidume ngakho,” esho. Uthi umdlalo wabo nechippa ngeke uze ube lula. “Uma sibhekene nechippa, ivele ibe nalowo mfutho nje, kuba nale nto eyifakayo eyenza umdlalo ube nzima. “Kodwa okuyikhona okwenza ukuthi ibe yingozi nakakhulu njengoba iza kithina, wukuthi iwinile phakathi nesonto, imimoya iphezulu nakuyona, izoza ngomfutho.
“Kodwa-ke siyilindele ngoba siwubukile nomdlalo wayo. “Engingakuthembisa abalandeli bethu wukuthi lo mdlalo uzoba seqophelweni eliphezulu, kuzodlalwa ibhola elimnandi. “Wumdlalo okufanele noma kanjani abantu bawubuke lona ngoba uzokuba seqophelweni eliphezulu, bazobona into yamehlo,” esho.