IZINGUQUKO ZE-IEC NGEZIKHUNGO IZAKHAMIZI EZIZOVOTA KUZONA
ZIZOJIKA izinto okhethweni lwalo nyaka, njengoba inhlangano eyengamele ukhetho eningizimu Afrika, i-independent Electoral Commission (IEC), imemezele ukuthi izovula iwindi kusuka izolo, ngolwesihlanu kuya kumhla ka-17 kunhlaba nonyaka, lapho abavoti benikwa ithuba lokuthi bazise le nhlangano uma bengeke bakwazi ukuvota ezikhungweni ababhalise kuzona ukuze bakwazi ukuvota kulezo abaseduze kwazo.
“Ngokomthetho, bonke abahlali baseningizimu Afrika kumele babhalisele ukuvota lapho behlala khona futhi bavote lapho bebhalise khona.
“Ngemuva kwezinguquko zeelectoral Act Section 2A, uma uhlela ukuvota lapho ongabhalisanga khona, kumele wazise I-IEC kusenesikhathi, yingakho-ke sivule leli windi lokwazisa I-IEC ngezinhlelo zokungavoti eziteshini ababhalise kuzona.
“Leli windi liyovalwa ngomhla ka-17 kunhlaba ngehora lesihlanu ntambama,” kusho I-IEC.
Ithi abafisa ukubhalisa kuleli windi bangavakashela i-website yakwa-iec, ngaphansi kwe-voters Portal, noma bavakashele amahhovisi aseduze akwa-iec phakathi nezinsuku.
Ithi abavoti abazobhalisa kulolu hlelo bazokwazi ukuvota emaphepheni emathathu okuvota (elikazwelonke, elesifundazwe, nelesifunda) uma evota kwesinye isiteshi esisesifundazweni abhalise kusona.
Iveze ukuthi ofisa ukuvota kodwa engekho esifundazweni abhalise kusona, uzokwazi ukuvota okhethweni lukazwelonke kuphela.
Ikhumbuzise ukuthi abavoti abasemazweni angaphandle bangakwazi ukuvota okhethweni lukazwelonke kuphela, ngeke bavote kolwezifundazwe.
Ithi abavoti abasemazweni angaphandle kabasaphoqelekile ukwazisa I-IEC uma befisa ukuvota, ngaphandle uma befuna ukuvota esiteshini esisezweni abangabhalisanga kulo.
“Uma ayebhalise ekwelinye izwe kodwa esefisa ukushintsha
ngoba esehlala kwelinye, uzophoqeleka ukwazisa isikhulu esiphezulu sakwa-iec.”
Iwindi lokwenza lokhu lizovulwa kuze kube wumhla ka-22 kumbasa nonyaka.
I-IEC iveze ukuthi bawu-27,7 million abantu ababhalisele ukuvota kuleli, kanti abasemazweni angaphandle okuyiengland, inetherlands, nasedubai ababhalisile balinganiselwa ku-27 673.