Liphezulu igama likakelly ngokubulawa kukameyiwa
Inkantolo izwe ukuthi nguyena owakhokhela untanzi u-r45 000 ngalowo msebenzi
KUVELE okushaqisayo izolo ngolwesihlanu, enkantolo enkulu yasepitoli ukuthi ummangalelwa wesibili, ubongani Ntanzi ecaleni lokubulawa kukasenzo Meyiwa owayengunozinti we-orlando Pirates nebafana Bafana, owadutshulwa wabulawa ngo-2014, wakhokhelwa u-r45 000 ngokwenza lowo msebenzi.
Kuvele nokuthi ngukelly Khumalo owakhipha umyalelo. Kuphinde kwavela nokuthi uyise kammangalelwa wokuqala, umuzikawukhulelwa Sibiya, wahola umhlangano owaphuma nesinqumo sokuthi udaba lokubulawa kukameyiwa lungabikwa emaphoyiseni.
Lokhu kuvele izolo ngolwesihlanu, ngesikhathi kugibele ebhokisini ufakazi wombuso, Ult-col Solomon Raphadu, ofunde isitatimende athi senziwa nguntanzi kuyena esiteshini samaphoyisa emoroka, ngo-2020.
“Ngafonelwa ngumthokoziseni, owayenomaphisa, bathi bafuna ngibalekelele ngomsebenzi othile obalulekile, ngavuma, ngase ngiya egoli.
“Ngaya ehostela evooslorus, ngahlangana nomuzi Sibiya nosifiso Zungu owaziwa ngelikankani, owasinika ulwazi lwangaphakathi.
“Ehostela sesihlangene nocarlos nomaphisa, ngatshelwa ukuthi umsebenzi ngowokubulala umeyiwa, nokuthi lokhu kwakuhlelwa ngukelly Khumalo, okunguyena futhi ozokhokha. Sahlukaniswa ngemisebenzi esasizoyenza. “Unkani wayezoshayela, usibiya agade, mina nocarlos singene ngaphakathi, umaphisa abe ngaphandle ukuze asilekelele uma kukhona okungahambi kahle,” kufunda uraphandu.
Uthi sebesendaweni yesigameko, bangena, baphoqa ababephakathi ukuba babanike imali nezingcingo. Ngesikhathi umeyiwa egxuma ehilizisana nocarlos, kwaqhuma isibhamu kabili, inhlamvu eyodwa yashaya umeyiwa esifubeni. Uthi ngemuva kwesigameko, babuyela ehostela wanikwa u-r15 000, wahamba nonkani beya egoli.
Ngakusasa waya edaveton, wahlala izinsukwana ngaphambi kokuthi unkani abuye amnike u-r30 000. Uthi imali abayithola kayibagculisanga kangangoba babamba umhlangano endaweni yasemahlathini, owalandelwa wukuthi usibiya apotshoze ulwazi kwabathile ngokubulawa kukameyiwa.
Uthi kwaba nokuxabana phakathi kukasibiya nabanye ababili abangeyona ingxenye yecala. Kwaze kwabanjwa umhlangano kubo kasibiya uholwa nguyise kamuzi, owanquma ukuthi udaba lokubulawa kukameyiwa kumele lunyathelwe, lugcinwe luyimfihlo. Nomndeni kuthiwa wawugcina lowo myalelo.
Ummeli kantanzi, umnu Sipho Ramosepele, usichithile lesi sitatimende, watshela inkantolo ukuthi ukube senziwa yikilayenti lakhe, ngabe sibhalwe ngesizulu.
Ijaji uratha Mokgoatlheng lithe umbuso kusamele wethule ubufakazi bokuqinisekisa ukuthi izitatimende ezethulwa enkantolo zenziwa yilabo okuthiwa bazenzile.
Leli cala selibuyele kwelikhulu (main trial) ngemuva kokuphothulwa kodaba oluthinta ubuqotho bezitatimende, obeludingidwa kusukela ngomfumfu (October) nyakenye. Luphothulwe ngolwesine.
Abammangalelwa bathi bashaywa bancishwa umoya ngamaphoyisa, ebaphoqa ukuba benze izitatimende bevuma ukuthi babulala umeyiwa. Ngakho lezo zitatimende kakumele zibe yingxenye yobufakazi.
Kulolu daba ijaji umokgoatlheng lithe inkantolo inqume ukuthi lezo zitatimende zizoba yingxenye yobufakazi ngoba ubufakazi babasolwa kabugculisi. Ligcizelele nokuthi isinqumo elisithathayo kakusona isigwebo futhi sisengaguquka uma kuqhubeka icala.
“Isinqumo esilapha kakusona esokugcina ngoba kusengavela ubufakazi obubalulekile, obungenza sisicubungule kabanzi. Isizathu sokuthatha lesi sinqumo wukuthi ubufakazi obethulwe ngabammangali kabenelisi,” kusho ijaji.
Khona manjalo isicelo esifakwe enkantolo enkulu yasegoli yizithandani, uthabo Bester nodkt Nandipha Magudumana sokumisa ukusakazwa kohlelo itracking Thabo Bester‚ oluzotshengiswa kwishowmax, sifeyilile.
Lezi zithandani bezikhala ngokuthi kakuzange kuxoxwe nazo kulolu hlelo, futhi ukudlalwa kwalo kungaba nomthelela ongemuhle ecaleni ezibhekene nalo.