UKHUZANI UKHALISE UMNDENI KABHEKA MCHUNU NGO-R50 000
UKHALISANE nomndeni wobengumsakazi wokhozi FM ngo-r50 000 esosweni umculi kamaskandi ukhuzani “indlamlenze” Mpungose wasemandaba, enkandla.
Uthi unikele ngale mali ngoba likhulu iqhaza elibanjwe ngubheka “Beekay” Mchunu emculweni wesintu emsakazweni ukhozi FM.
Ukhuzani uveze ukuthi yiyona indlela aveza ngayo ukuthinteka kwakhe ngokudlula emhlabeni kwalo msakazi.
“Ubephila kakhulu nabantu ubeekay, waweseka kakhulu umculo wethu. Ngaphezu kwalokho, besiphilelana naye kakhulu,” kusho ukhuzani.
Ukhuzani uthi nakuba ephonsile nasemnikelweni ohlanganiswe ngabaculi, kodwa ukubone kubalulekile nokuthi anikele ngokohlelo lwakhe eceleni.
“Izindlela esithinteka ngazo emoyeni azifani, nami kwazi mina nenhliziyo yami ukuthi ukwelula kwami isandla ngalolu hlobo, kungithinte kangakanani ukulimala kwaleli qhawe.”
Ngolwesihlanu amaciko abeholwa nguthokozani “Somnandi”
Langa, akhalisane nomndeni wakwamchunu, ahambisa inkomo ehamba ngezinyawo.
Phakathi kwamaciko abeyingxenye yokuhlanganisa amehlo nomndeni kubalwa ucevuzile, usaliwa, ugatsheni, nojumbo.
Engxoxweni kasomnandi naleli phephandaba, uthe uhlabe ikhwelo kubaculi ukuba bafake isandla, kube khona okwenziwayo.
Uthe lokhu abakwenzile, bakwenze egameni labo bonke abaculi bakamaskandi.
“Besingeke sizibe ekubeni ubeekay ubekade esimemeza
kamnandi kangaka, kudume izinkalo zonke.
“Ubekubiza emoyeni kube mnandi enhliziyweni, ngendlela nje aluphathe kahle ngayo uhlelo lwamaciko kamaskandi.
“Izinsizwa-ke ezikwazile ukuhlanganisa, zihlanganisile amasenti kwaphuma inkomo,” kusho usomnandi.
Uthe ukufa ukufanisa nentombi eqoma ingasheliwe nenhlabathi eyomboza wonke umuntu.
Ubeekay ushone ngolwesibili ntambama ephuthunyiswa emtholampilo wangakubo empangeni.