Ngihlabeke umxhwele inkatha igcwalisa imoses Mabhida
MHLELI: Ngicela ukubongela I-IFP ngokwethula ngempumelelo umqulu wayo wezethembiso emoses Mabhida Stadium, ethekwini, ngesonto eledlule.
Ngizwakalisa ukuyibongela ngokugcwalisa le nkundla enkulukazi ethekwini, okuyinto ebengingathembi ukuthi izokwazi ukuyenza emuva kokubona ingqophamlando YE-EFF neye-anc yokugcwalisa inkundla efanayo mhla la maqembu ethula imiqulu yawo emasontweni adlule.
Sekuwumlando ukuthi I-IFP isiwethulile nowayo umqulu onezethembiso zentuthuko uma inqoba ukhetho.
Kokuningi okwethulwe ngumengameli waleli qembu, umnu Velenkosini Hlabisa, ngihlabeke umxhwele lapho ethembisa khona abantu baseningizimu Afrika ngophenyo I-IFP ezolwenza maqondana neziqeshana zomhlaba ikakhulukazi lezi ezibonakala zinganakiwe futhi kungekho lutho olusetshenzwa kuzo
Ukubeke kwacaca ukuthi bafuna ukuzazi lezi ziqeshana zezindawo ukuthi zingakuphi, nokuthi ngobani abanikazi bazo, lokhu okubizwa phecelezi ngeland Audit.
Ngeke kusale ukuthi yikuphi abanikazi balezi zindawo abangakuveza uma betholakala, njengesiqiniseko sokuthi banobunikazi obuphelele bezindawo.
Ngithi lesi sethembiso singihlabe umxhwele ngoba impela ziningi izindawo esezaphenduka amahlathi okucasha izephulamthetho, okungaziwa ukuthi ngobani abanikazi bazo. Ezinye izindawo ezidinga lolu phenyo zigadiswe abantu bokufika. Ubone ngomjondolo kathayela ukuthi kukhona unogada. Uma ufuna ukuthola kahle ngomnikazi wendawo, kucace ukuthi kawusoze wamnuka.
Impela kunebala elikhulu osekuphele iminyaka lingakhiwe, abantu bezifuna kangaka izindawo zokuqala amabhizinisi.
Izindawo ezifana nalezi nezinye I-IFP ekhuluma ngazo, zingalekelela ukulwa nesimo sokushoda kwezindawo zamabhizinisi, ngingakushiyi
ngaphandle ukwakhiwa kwezindlu zemixhaso okungesinye sezidingo esithandwa kakhulu ngabantu.
I-IFP ingalwenza lolu phenyo lwalezi zindawo ngokubambisana nomnyango othintekayo komasipala ezingaphansi kwabo.
Kumasipala wasethekwini lo mnyango ubizwa ngokuthi yireal Estate, okuyiwona ongalekelela uphenyo lwe-ifp ukuze ithole kabanzi ngalezi zindawo.