Umqeqeshi nesexwayiso esimqoka kwisafa
Kunomdlali ozalelwe kuleli okumele akhethe phakathi kwebafana nenigeria
UTHUMELE isexwayiso enhlanganweni eyengamele ibhola kuleli isouth African Football Association (Safa) ngomdlali wabo osemncane umqeqeshi wesupersport United.
Isupersport izobhekana nerichards Bay FC kowelast 16 yenedbank Cup namuhla ngomgqibelo ngo-15h00 eking Zwelithini Stadium, emlazi.
U-ime Okon (20) odlala emuva kwisupersport, ubhekene nengwadla njengoba kufanele akhethe ukuthi ufisa ukudlalela iqembu lesizwe lakuleli ibafana Bafana noma isuper Eagles yasenigeria njengoba enelungelo lokukhetha izwe elilodwa kuwona angalidlalela.
Uzalelwe kuleli kodwa uyise ungowasenigeria. Useke wabizelwa kwibafana kodwa akakaze adlale.
U-andre Arendse ongumsizi womqeqeshi kwisupersport, uthumele isexwayiso kwisafa ngodaba lwalo mdlali.
“Kuzofanele iqaphele isafa ukuthi kasilahlekelwa ngumdlali oseqophelweni eliphezulu njengaye. Ngidlalile mina nezitobha eziseqophelweni eliphezulu, ngiyayazi into engikhuluma ngayo ngoba lo mfana ngisebenza naye imihla namalanga,” kusho u-arendse.
Uthi umdlalo wabo nerichards Bay uzokuba muhle ngendlela eyisimanga.
“Okuhle wukuthi siseyingxenye yalo mqhudelwano. Lo mdlalo uzokuba nzima ngoba sidlalile nabo ngozibandlela (December) basehlula yize besingasaphelele. Nakhona kodwa kangikholwa ukuthi ukuba besiphelele besizobehlula.
“Iyangimangaza indaba yerichards Bay, indlela edlala kahle ngayo ngiyazibuza ukuthi kungani ibalwa namakilabhu angase agencwe yizembe.
“Inabalandeli abayifuqayo, uma uhleli ebhentshini ubezwa kahle befaka umfutho kubadlali bayo. Kodwa-ke kulo mdlalo siyozinaka thina, siyokwenza esikwaziyo hhayi okunye,” kusho u-arendse.