ABE-IFP balinde uramaphosa ngezingxoxo zokuthula
Bathi kumele kwakheke ubumbano
KULINDWE impendulo kamengameli wezwe umnu Cyril Ramaphosa ngomhlangano wezingxoxo zokuthula, ophakanyiswe YIANC Kwazulu-natal, kulandela isigameko sangesonto eledlule ezinkundleni zemidlalo Kwaceza, lapho kwasabalala khona imibiko yokuhlaselwa kwamalungu E-ANC, ayehambele lo mcimbi egqoke umfaniswano waleli qembu.
Lokhu kuvele esithangamini sabezindaba ebesihlelwe yileli qembu emahhovisi alo ethekwini, izolo ngolwesihlanu.
Umengameli WE-IFP umnu Velenkosini Hlabisa, uveze ukuthi ngemuva kokuthola incwadi eyabe ibhalwe ngunobhala WEANC esifundazweni, umnu Bheki Mtolo, icela umhlangano wezingxoxo zokuthula ngemuva kwalesi sigameko, wabe esekhetha ukuthi abhalele umengameli Ramaphosa ukuze lolu daba ludingidwe ngokusezingeni likazwelonke.
Uhlabisa uthe lokhu ukwenze ngenxa yokuthi umengameli wayekhona kulo mcimbi, futhi waphawula ngalo nasesidlangaleni.
Uthe nakuba bezimisele ukuthi zibe khona lezi zingxoxo zokhwakha ukuthula phakathi kwala maqembu, kodwa bakhathazekile ngezinkulumo ezenziwe ngabaholi BE-ANC nondunankulu wesifundazwe unkk Nomusa Dube Ncube, abasole amalungu E-IFP ngokuthi yiwona ahlasela kulo mcimbi.
Uthe kuyiphutha ukuthi laba baholi bajahe ukulibeka ngembaba elokuthi laba bahlaselwa ngamalungu E-IFP.
“Kuyingozi ukwenza izinkulumo eziphehla udweshu, ikakhulukazi njengoba kuza ukhetho lukazwelonke,” kusho uhlabisa. Uthe abaholi bezepolitiki kumele kube yibona abaqaphelayo uma bekhuluma njengoba kungaba yingozi ukuthi bakhulume ngaphandle kobufakazi.
“SIYI-IFP sinxusa noma ngubani ozoba nobufakazi balezi zinsolo ezenziwe ngamalungu ethu. Uma bukhona, sizimisele ukuthatha izinyathelo, sizisole uma kunesidingo,” kusho uhlabisa.
Uthe njengoba egcine esebhalela umengameli, uselinde ukuthi aphendule ukuze zisheshe ziqale izingxoxo, kufinyelelwe emnyombweni wokwenzeka.
“Encwadini esiyibhalile siphakamise ukuthi kukhethwe abaholi abathathu abasezigungwini eziphezulu zala maqembu ukuthi kube yibona abahlela ukuhlangana nokuthi lo mhlangano wenzeke, futhi uphume nesisombululo.
“Laba baholi abathathu kula maqembu, yibona abazosebenzisana nezigungu zezifundazwe ukuze kwakheke ubumbano, futhi uma kunesidingo sokushweleza kubekhona nhlangothi zonke,” esho.
Uhlabisa uphinde waphawula nangodaba oluthinta ukuhlwithwa kombhobho wokukhuluma okwenziwa ngungqongqoshe wezokuthuthukiswa komnotho umnu Siboniso Duma kusakhuluma undunankulu kazulu, umfu Thulasizwe Buthelezi.
Uthe kuyishwa okwenzeka kanti kuyiphutha ukuthi kusheshe kunconywe isenzo sikaduma ekubeni kwagcina kungatholakalanga ukuthi wayefuna ukuthini undunankulu kazulu.
Uthe kuyilungelo lesilo ukuthi simemezele noma ngubani esimbona efanele ukuba aphathe lesi sikhundla.
“Yisona isilo esinelungelo lokuphawula ngenkulumo kandunankulu waso uma akushoyo kuhambisana noma kungahambisani nomcimbi,” kusho uhlabisa.