KUKHUTHAZWE UBUMBANO KWABEZEPOLITIKI
AVUMELANE ngezwi elilodwa lokuziphatha kahle nokuqinisekisa ukuthi akukho ukuklwebhana emalungwini awo amaqembu ezombusazwe abeyingxenye yokwakhiwa kwesivumelwano sokubamba ukhetho olukhululekile futhi olunokuthula.
Abaholi bamaqembu ahlukene okubalwa kuwona I-ANC, I-IFP, i-actionsa, INFP, IDA, IMK Party, I-EFF NENAPF abehlanganele ehholo lomphakathi elibude buduze nedolobha lakwanongoma izolo ngolwesihlanu.
Lo mhlangano ubuhlelwe ngokubambisana kwabaholi bemikhakha eyehlukene, okubalwa kubona ukhomishana wamaphoyisa Kwazulu-natal, ult General Nhlanhla Mkhwanazi, ungqongqoshe wezokuphepha, ezokuthutha nokuxhunyaniswa komphakathi Kwazulu-natal, umnu Sipho Hlomuka nosihlalo wendlu yamakhosi inkosi Sifisomandelu Shinga.
Ethula inkulumo kulo mhlangano ult-gen Mkhwanazi uthe, amaphoyisa abekelwe ukuqinisekisa ukuthi kabekho abantu abaphazamisa amalungelo abanye uma bekhankasa.
“Sizokwakha isivumelwano sokusebenzisana kahle futhi kubanjwe ukhetho olunokuthula. Sizonxusa amaqembu ukuba kube nokubekezelelana uma kukhankaswa, kungabikho izigameko zodlame. “Kuyilungelo lawo wonke umuntu ukuthi azikhethele inhlangano yezombusazwe afuna ukuhambisana nayo, futhi unelungelo lokukhankasa abanye abantu ukuba bajoyine iqembu lakhe.
“Umthethosisekelo unikeza wonke umuntu ilungelo lokwenza noma yini evumelana nenhliziyo yakhe, kodwa inqobo nje uma lingaphazamisi abanye abantu. “Thina njengamaphoyisa sinomsebenzi esiwunikwe wumthethosisekelo wezwe wokuba siqinisekise ukuthi amalungelo ezakhamizi zakuleli avikelekile,” kusho ult Gen Mkhwanazi.
Sekusele izinsuku eziwu8 4 elakuleli libambe ukhetho lukazwelonke nolwezifundazwe. Lolu khetho luzobanjwa mhla ka-29 kunhlaba (May) kophezulu.