USOMLOMO EZINSOLWENI ZAMACALA ENKOHLAKALO
APHENDUKE ngomzuzu wokugcina amatafula ngokuboshwa kukasomlomo wephalamende unkk Nosiviwe Mapisa-nqakula, njengoba ekwazile ukuthi akuvimbe, kugcine kungenzekanga izolo ngolwesihlanu ekuseni.
Usomlomo Mapisa-nqakula, bekulindeleke ukuba azinikele esiteshini samaphoyisa ecentral Park, epretoria kodwa wakwazi ukuthi athole incwadi ekuvimbayo lokhu, kungenzeki.
Lokhu kwenzeke sekusabalalele imibiko kwabezindaba yokuthi nakanjani ziyamkhalela, futhi kulindeleke ukuba avele enkantolo khona izolo.
Umapisa-nqakula unxuse inkantolo ukuba imdlulisele yonke imiqulu yedokodo lakhe njengoba eveze ukuthi ukhathazekile ngokuthi isiputshukele kwabezindaba ekubeni yena engenalo ulwazi oluqukethwe yiyona.
Umapisa-nqakula uzithola esobishini nje, kulandela izinsolo zokugwazelwa okubikwa ukuthi zenzeka esangungqongqoshe wezokuvikela kuleli.
Izinsolo ziveza ukuthi wagwazwela ngesamba esiwu-r2.3 million ngemuva kokukhishwa kwethenda ngusomabhizinisi unkk Nombasa Ntsondwa-ndhlovu okuvela ukuthi ushade nomunye wojenene embuthweni ngaphansi
kweze-mpilo.
Ngolwesibili abaphenyi bagasele emzini kamapisa-nqakula, ngenhloso yokuqhuba uphenyo ngalezi zinsolo osekunesikhathi zisabalele.
Encwadini ayibhalele inkantolo, uveze nokuthi ukugasela kwamaphoyisa emzini wakhe kwakungekho emthethweni.
Ukhale ngokuthi ukusabalala kwemininingwane ethinta leli cala kwabezindaba kakugcini ngokubeka impilo yakhe engcupheni, kodwa nesimo sakhe sezempilo siyathinteka njengoba engumuntu osekhulile ngeminyaka.
Kuleli sonto umapisa-nqakula ubhalele iphalamende, enxusa ukuthatha ikhefu eliyisipesheli kulandela ukusabalala kwalezi zinsolo.
Iphalamende likuqinisekisile ukuthatha ikhefu kukamapisanqakula.
Khona manjalo I-ANC ikhiphe isitatimende ngokuthatha ikhefu kukamapisa-nqakula, yaveza nokuthi izosebenzisa uhlelo lwayo lokushenxa esikhundleni kulabo ababhekene namacala uma imininingwane ngalokhu iqhubeka nokuvela.
Bheka nasekhasini 14.