Indida ‘kubhuntsha’ umhlangano WE-ANC ngodaba lukaduma
Kuthiwa ubuholi beqembu buhlela ukuyoshweleza esilweni
KUQUBUKE indida izolo ngolwesihlanu ‘kubhuntsha’ umhlangano lapho iqembu LE-ANC Kwazulu-natal, bekulindelwe ukuba liyoshweleza esilweni umisuzulu kazwelithini ngesenzo sikasihlalo walo, umnu Siboniso Duma.
Uduma usolwa ngokuhlwitha umbombo kundunankulu kazulu, umfu Thulasizwe Buthelezi, nesikhathi ekhuluma emcimbini wokubungaza isilo udinizulu obukwaceza, ngempelasonto edlule.
Amakhosi akuqinisekile ukuthi azwile ngalo mhlangano obekuthiwa uzokuba khona.
Ekhuluma naleli phephandaba, usihlalo wendlu yabaholi bomdabu Kwazulu-natal, inkosi usifiso Shinga, uthe: “Ngike ngayibona incwadi, becela ukuyobonana nesilo.
“Ngokwazi kwethu umhlangano lowo ubhuntshile, awubanga khona izolo. Amakhosi ahlanganile esishayamthetho esidala olundi, avumelana ngokuthi uduma kumele aqale kuwona ngaphambi kokuba aye esilweni.”
Nesekela lakhe inkosi ungqayizivele Sithole lithe linalo ulwazi ngalo mhlangano.
“Besinalo ulwazi ukuthi baya kobonana nesilo. Thina singamakhosi sahlongoza ukuthi siqale sihlangane nabo sodwa, ngaphambi kokuba siye esilweni, ukuze siye sesiphethe igama elilodwa,” kusho inkosi usithole.
Okhulumela I-ANC, umnu Mafika Mndebele utshele ILANGA Lempelasonto ukuthi umcimbi kawubhuntshanga, kodwa babelinganisa ukuthi ungaba nini.
“La mahlebezi abhebhethikiswa ngabezindaba, kasikaze silusho usuku, kodwa besingathekisa ukuthi kungaba yizolo.
“Esikutholile wukuthi ngeke siye sodwa siyiqembu endlunkulu, kumele sikhashwe ngamakhosi.
“Ngingasho njengamanje ukuthi
sesikwenze konke, sesilinde usuku lokuya esilweni,” kusho yena.
Uphinde waveza ukuthi umengameli umnu Cyril Ramaphosa ukhathazekile ngokuthi kungenzeka kuqubuke udlame.
“Sixolisile kumengameli wezwe, naye uduma uzixolisele.
“Umengameli uthe makungaphinde kwenzeke lokho.
“Simbikelile ukuthi sesibhalele umengameli weqembu LE-IFP, umnu Velenkosini Hlabisa, incwadi simcela ukuba siqhubeke, sixoxe ngokwakha uxolo.
“Undunankulu kazulu umfu Buthelezi naye kumele ngabe wenza okufanayo, axolise ngesenzo sakhe,” kusho umndebele.
Imizamo yokuthola ukuphawula kwasendlunkulu ayiphumelelanga njengoba izingcingo bezikhala, zingaphendulwa.