ISILO SIGXEKA ISENZO SOMHOLI WE-ANC
ISILO umisuzulu kazwezilithini sigxeke isenzo sikangqongqoshe wezokuthuthukiswa komnotho Kwazulu-natal, umnu Siboniso Duma, sokuhlwitha umbhobho wokukhuluma undunankulu kazulu, umfu Thulasizwe Buthelezi.
Ngokubika kwetimeslive, isilo sichaze lesi senzo esisematheni, esenzeka ezinkundleni zemidlalo kwaceza, njengesingalungile, esiphehla udlame futhi esingakhombisi ubu-afrika.
Kuthiwa ihhovisi lesilo liveze ukuthi ngokwesintu, kuwukuhlukumeza ukuvimba umuntu ukuba akhulume noma aveze umbono wakhe nganoma yiyiphi indlela.
Sekuyindaba esegudwini ukuthi ngeledlule, emcimbini wokukhumbula iminyaka ewu-110 kwakhothama isilo udinizulu kacetshwayo, kwabonakala uduma ehlwitha umbhobho kumfu Buthelezi, esakhuluma ngenhloso yokwethula isilo ukuze sikhulume nezicukuthwane namalungu omphakathi ayehambele lo mcimbi.
Lesi sigameko sasusa umsindo njengoba kwaba nokusolana ngendlela uduma aziphatha ngayo, abanye basola ubuthelezi ngokufaka ipolitiki enkulumweni yakhe yokwethula isilo.
Kuleli sonto I-ANC imemezele ukuthi uduma uxolisile esilweni nakumengameli Cyril Ramaphosa, ababekhona kulo mcimbi.
Iveze nokuthi nakuba uduma exolisile kulaba baholi, kodwa ngeke axolise kubuthelezi njengoba I-ANC imsola ngokuthi ubezama ukuziqoqela amaphuzu ngokuyihlasela, esebenzisa isikhundla sakhe njengondunankulu kazulu.
Kubikwa ukuthi isilo siqoke ikomidi lamalungu ayishumi lamakhosi nabasendlunkulu ukuba lisingathe lolu daba, liphinde lixhumane nazo zonke izinhlaka ezithintekayo, bese liseluleka ngokuzomele kwenzeke kuya phambili ngalolu daba.
Siphinde sakuhlaba okushiwo YI-ANC kokuthi isikhundla sikandunankulu kazulu kasikho emthethweni ngokukahulumeni, njengoba singashicilelwe kumthethosisekelo.
Ngokombiko wetimeslive, kuvele ukuthi ngokwasebukhosini bakwazulu, undunankulu nguyena umkhuzi wamabutho, futhi okhulumela isilo ngokusemthethweni, ngakho kuwumsebenzi wakhe ukwethula isilo kubantu ngaphambi kokuthi sethule inkulumo yaso.
Kubikwa nokuthi isilo siphinde sancoma indlela undunankulu waso azehlise ngayo, nokuziphatha ngesizotha ngesikhathi kuqhubeka lesi sigameko.