UBHEKWE NGABOMVU OBOPHELE IZINTANDOKAZI KWI-E.TV
UBOPHELE izintandokazi zabalingisi umdlalo ozovala isikhala sikanikiwe esiteshini sikamabonakude esizimele i-e.tv, obizwa ngokuthi yisiphetho.
Lo mdlalo owuchungechunge obhekwe ngabomvu, kulindelwe ukuba uqale ukukhonjiswa ngomhla ka-15 kumbasa (April) ngo-18h30 kusihlwa.
Ubophele ulozolo lwabalingisi okubalwa kubo ugugu Gumede, ulinda Sokhulu, umjosti Mbhele, umbali Mavimbela nabanye. Ngokusho kwesitatimende esikhishwe ngabalo mdlalo, umayelana nemfihlo yabangani abane, eyenzeka eminyakeni ewu-30 eyedlule.
Kuthiwa laba bangani bazama ngakho konke okusemandleni abo ukuqinisekisa ukuthi ayiputshuki, ngoba ukuputshuka kwayo, buzochitheka bugayiwe.
Umandla N, ongumqondisi walo mdlalo futhi ongumnikazi wenkampani iblack Brain, uthe okuzojabulisa kakhulu ababukeli ngalo mdlalo, yithalente elisha abalitholile ngesikhathi benza imizungezo yokuthungatha ikhono elisha ezifundazweni okubalwa kuzo ilimpopo, igauteng, ikwazulu-natal ne-eastern Cape.
“Asisakwazi ukulinda ukuze abantu babone ukuthi sibaphatheleni kulo mdlalo.
“Sinethemba lokuthi abantu bazogxila kumabonakude wabo ukuzibonela okwehlukile njengoba siza nokungajwayelekile,” usho kanje.
Umandla N waziwa kakhulu ngokuqondisa imidlalo ethwandwa ngabaningi kumabonakude, okubalwa kuyo iblack Door, ismoke and Mirrors neminye.
Kulo mdlalo ulinda uzobe edlala indawo kablondie, umjosti elingisa ekazwelakhe, ugugu adlala ekaconnie, kuthi umbalenhle abe ngubuhle.
Phakathi kwabanye abalingisi abazobonakala kulo mdlalo kubalwa ukope Makgae, uthulani Mtsweni, no-upile Bongo. Kubhekwe ukuthi lo mdlalo ube nedumela njengoba ungena esikhaleni sobuthandwa ngaba-ningi kulesi siteshi, kanti ufike kahle kuqala unyaka omusha wezimali, lapho kwenzeka khona izinguquko kumabonakude.