Uzohlonzwa ngohlelo 'oluvulelekile' ozovala isikhala sikabeekay
Kuthiwa utshatha nguyena ozobe esiza ubingelela Mpanza kusgiya Ngengoma okhozini FM
UZOCINGWA ngohlelo olukhethekile umsakazi ozovala isikhala sobeshayela uhlelo lukamaskandi usgiya Ngengoma okhozini FM, ubheka “Beekay” Mchunu.
Ngokuthola KWELANGA Lempelasonto, ukhozi luzokwenza uhlelo oluvulelekile ukuhlonza umsakazi ozongena ngokugcwele kulolu hlelo, ozolekelelana nobingelela Mpanza obeyibambe nobeekay, odlule emhlabeni ngeledlule.
Umthombo waleli phephandaba uthi ngeke lo msakazo uthembele kwabanye abasakazi abakhona bakamaskandi ngoba banezinye izinhlelo abazenzayo.
“Baningi abasakazi abaqashwe emsakazweni ngohlelo oluvulelekile lokuhlonza, kanti abanye balandwe kwezinye iziteshi.
“Nakulolu hlelo kukhona okusakhulunyelwa phansi ngabaphathi, nakuba kungaziwa ukuthi kuyokwenzeka nini,” kusho umthombo.
Umphathi wezinhlelo okhozini, unkz Pearl Maseko, umemezele ukuthi lolu hlelo luzobanjwa ngukhathide “Tshatha” Ngobe ngokubambisana nobingelela Mpanza, kuze kube abaphathi bathatha isinqumo ngesikhala sikabeekay.
Ubeekay ushone ngolwesibili olwedlule empangeni ngemuva kokugula isikhathi eside, ephethwe ukufa okungaziwa.
Ugule kusukela ngonyaka ka-2020, kanti kuthiwa ubevame ukukhala ngokuthi uphelelwa wumoya.
Kwezinye izikhathi ukugula bekumphazamisa ngisho esakaza, agcine engaluqedi uhlelo.
Lolu hlelo lusakazwe ngabasakazi abaningi kusukela kuwelcome “Bhodloza” Nzimande (ongasekho), lwaya kutshatha,
waphinda walwenza nongizwe Mchunu osaxoshwa kulesi siteshi. Lwenziwa nanguzimiphi “Zimdollar” Biyela, ngunkosinathi Mshengu kanti nolucky Nkosi, obelubamba ngezikhathi ezithile.
Ukufa komsakazi wezinhlelo zomculo wesintu, kwenzekile nangonyaka ka-2014 kumhlobo Wenene FM kushona usaba Mbixane, owalimala engozini yesithuthuthu.
Ushone esakaza uhlelo obelungena ngolwesine ebusuku oluthi “Siwel uthukela” nolungena ngomgqibelo oluthi “Lavuth’ ibhayi”.
Umonwabisi “Gudla” Bangi ungumsakazi otholakale ngohlelo lokucingwa komsakazi ozongena esikhaleni sikasaba Mbixane kumhlobo Wenene.