Kubalulekile ukwazana nonkulunkulu uma ucula igospel
UMCULI wegospel ubalula ukubaluleka kokuba nobudlelwano nonkulunkulu uma ungumculi walolu hlobo lomculo. Usimphiwe Khuzwayo owaziwa ngelikasnothi K uthi: “Ungayiculi i-gospel uma ungazani nojehova ngoba lokho kungakubangela ukuthi ugcine usuphuma endleleni, ufuna impumelelo ngendlela yobumnyama ngoba kawuvikelekile ngokukamoya,” kuchaza yena.
Uthi le album ayiphekayo e-studio ezophuma ngenyanga ezayo, ingeyesi-8. Okwamanje usakhiphe umucu ukutshengisa abalandeli bakhe okuqukethwe yiyona.
“Abalandela uhambo lwami emculweni, bayasazi isitayela sami futhi bazozwa ukuthi kulokhu ngikhule kangakanani njengoba ngithathe ikhefu leminyaka eyisihlanu ngaphambi kokukhipha.
“Ngihlale phansi, ngabheka ukukholwa nobudlelwano bami nonkulunkulu ukuthi bukuphi. Amaculo kulokhu abezifikela wona,” esho.
Uthi umculo we-gospel akawenzeli udumo, uwenzela ukuthinta izinhliziyo zabantu nokushumayela izwi likankulunkulu.
Umucu awukhiphile isihloko sawo sithi, ‘Sekude Kwalapha Uhleli Nathi’.
“Siyisizwe sibuya ezintweni eziningi, sashonelwa ngesikhathi sokhuvethe, kwafika nezikhukhula zenza okufanayo kwadlula nemiphefumulo yabantu.
“Enhliziyweni yami nginakho ukuthi sifanelwe wukumbonga unkulunkulu njengoba esikhethile sisekhona namanje,” kusho usnothi K.
Le nsizwa ibinguthisha kusukela ngo-1996, yashiya ngo2001 ngenxa yothando lomculo. Ithi lokhu yakubona sekwedlule isikhathi ukuthi yenza iphutha elingakanani.
“Kubalulekile ukuthi ithalente lihambe nemfundo eceleni, ngisho ngabe ufundela umkhakha onethalente kuwona.
“Uma uthanda ibhola kakusho ukuthi ungaba ngumdlali walo kuphela, kepha ungaba ngumqeqeshi. Kanjalo nasekuculeni kuningi okwenziwayo ngaphandle kokucula, okubalwa ukuba ngunjiniyela, ukubhala nokunye,” ephetha.
Le nsizwa isike yaqokwa kumasouth African Music Awards, nakumacrown Gospel Music Awards, yaphinde yashiyelana isiteji nohlengiwe Mhlaba, uvuyo Mokoena, ufikile Mlomo, usgwili nobabo
nabanye.