Inkosi ifisa ukukhunjulwa ngokulethela abantu amanzi
Ukuba semkhandlwini wamakhosi nakwipolitiki ithi kuyasebenzisana, akushayisani
INKOSI yesizwe sakwashabalala, emnambithi, untandoyenkosi Shabalala, iphinde ibe yimeya kumasipala wesifunda, uthukela, ithi ikhule ifisa ukuba ngudokotela noma yijaji, kodwa yagcina ingena emkhakheni wobuthishela ngemuva kokuqeda umatikuletsheni.
Engxoxweni yayo naleli phephandaba, ithe kayikaze ikubone kushayisana ukuba ngumholi wendabuko nokuba ngumholi ngokwepolitiki.
Ithi ngaphansi komkhandlu wobukhosi bayo iqhamuke nombono wokuthi amakhansela kubalulekile ukuthi abe yilungu lomkhandlu wesizwe ngoba lokho kwenza izinto zibe lula.
Yize igcine ingusopolitiki, ekukhuleni kwayo ithi ibinesifiso sokuba yijaji ngoba uyisemkhulu wayo, inkosi Nhlanganiso Shabalala, wathi ngesikhathi izalwa yamqamba igama lesingisi, okwakuyigama lommeli ayemsebenzisa, ubisset ngesikhathi elwela ubukhosi bakubo.
Ithi uninakhulu wayo wathi uma eyibuza ukuthi leli gama lesingisi ngoba akakaze alibone nakwisichazamzwi lisho ukuthini, yamtshela ukuthi nguyisemkhulu wayo owametha lona ngoba ethande ubuhlakani balowo mmeli. Ithi kuthiwa uyisemkhulu wayo wayethi uyafisa ukuthi ikhule yenze izinto njengalo mmeli wakhe.
“Ngiyakholelwa ekutheni ikhona inhlese yokuthanda ukuba yijaji eyayisuka lapho noma ngangingazi ngaleso sikhathi ukuthi uqala kuphi kepha mina ngangifuna ukuba yijaji,” isho.
Ngenxa yokungabi khona kwemali kubo, ithi kayikwazanga ukuya esikhungweni semfundo ephakeme iyofundela eyayikuthanda, igcine ifundela ubuthisha. Ithi ukuba nguthisha igcine ikuthanda yaze yaba nguthishanhloko.
“Nakhona ekufundiseni, ngangifisa ukuba nguthishanhloko kodwa kawukwazi ukufinyelela lapho ungaqalanga ekubeni nguthishela,” kusho inkosi.
UQALE UKUFUNDISA NGO-1996
Ngo-1996 iqale ukufundisa esikoleni samabanga aphansi, iveyisi Primary, yadlulela ekubeni nguthisha emhlanganyelwa Combined, lapho igcine iba nguthishanhloko wakhona.
“Ngifike kulesi sikole bengangazi nokuthi ngiphuma kuphi, kodwa abazali babengithanda, bethi ngihlukile kunabanye othisha nezingane zabo ngiyazihlonipha. Kuthe uma kuvela isikhala sikathishanhloko nami ngafaka isicelo, kanti kothisha esasifundisa nabo kwagcina kusele igama lami kuphela. Ngagcina nginguthishanhloko, kwenzeka lokhu engangikuthanda,” esho.
Ushabalala uthi kushintshe izinto ngosuku lwangomhla ka-16 kunhlolanja (February) 2009, lapho kungene ucingo olwaluvela emgungundlovu esishayamthetho, athi lwaluthi umsunguli weqembu Inkatha Freedom Party, inkosi Mangosuthu Buthelezi imcela ukuba ayoba yilungu lesishayamthetho, ngemuva kokusula kukamnu David Gandaganda Ntombela.
“Ngishayele abantu abahlukene engangibethemba, bangibonise ngesinqumo esifanele. Kulabo bantu kwakukhona nomnu Stanley Dladla, oke waba yimeya yasothukela. Waba nomthelela omkhulu ekutheni ngigcine ngingena kwezepolitiki.
“Ngikhule ngaze ngagcina ngingunobhala wesifunda sasothukela ngaphinde ngahlala nakwezinye izinhlaka zeqembu. Ebantwini engakhuluma nabo, bathi uma umntwana engibizile mangiye ngoba kusho ukuthi kunayekubonile kimina,” esho.
Uthi ube esesula ekubeni nguthishanhloko, wafika khona waba yilungu izinyanga ezimbili ngoba kwakuzoyiwa okhethweni, okuthe ngemuva kwalo, waphinde wabuyela khona esishayamthetho, kwaze kwaba wu-2014.
Uthi ukuya esishayamthetho waphinde wakuvunyiswa nawukuthi wayezoba neqhaza ekuthathweni kwezinqumo ezithile, ezizoshintsha impilo yabantu.
“Kangesabanga ukuthatha lelo thuba ngoba vele ngangingafihli ukuthi ngiyilungu lale nhlangano, kunalokho wawuthi uma ukhuluma ngenkosi Shabalala yasemnambithi, abantu bakubuze ukuthi usho inkosi Shabalala eyinkatha,” esho.
AKABANGE ESABUYELA ESISHAYAMTHETHO
Ngemuva kuka-2014, ushabalala uthi izinombolo kazibange zisamvumela ukubuyela esishayamthetho, waqhubeka nomsebenzi wakhe wobukhosi ngokugcwele, okuthe ngaphambi kokhetho lohulumeni basekhaya ngo-2021, igama lakhe laphakanyiswa ukuthi angaba ngabanye babantu abangamela leli qembu ukulungisa isimo kulo masipala.
Uthi uyakholelwa ekutheni ubukhosi ngokwabo nabo buyipolitiki, umehluko wukuthi uzalwa nabo kodwa epolitikini usuke ubekwe ngabantu.
“Kufana ngenxa yokuthi njengamakhosi, umsebenzi wethu wukubhekelela abantu njengoba nakwesobumeya kuyinto efanayo.
“Kuyasisiza futhi ukuthi thina kasibona laba baholi abayizikhulu ngoba sikhonela ukusebenzela abantu. Ngilapha kuleli hhovisi ngoba ngenza into efanayo nento engiyenza njengenkosi. Nalana
ebukhosini kawukho umehluko, kunalokho kusebenza kahle ngoba uma abantu befuna intuthuko bafika enkosini, kakukho engakwenza kepha kumele idlulele ekhanseleni nalo elisazoya kumasipala.
“Manje uma abantu bekhala ngentuthuko, ngiqonda kahle ukuthi badingani, noma kuthathwa izinqumo kulula ukuthi ngifike ngitshele umkhandlu wami ukuthi kuthathwe izinqumo ezizobathinta kanjani komasipala uma ikhansela lingekho.
“Okunye engifike ngakunquma wukuthi uma uyikhansela elingaphansi kobukhosi bami, kumele ube yilungu lomkhandlu ukuze uma kunemibuzo noma izidingo, ikhansela lisheshe lizazi,” echaza.
Ushabalala uthi ukuba kuya ngaye, ngabe amakhansela nezimeya ezisezindaweni ezisemakhaya baqala basebenze nemikhandlu yamakhosi ukuze baqonde ukuthi ubukhosi busebenza kanjani.
“Kwezinye izindawo amakhansela abukela phansi isakhiwo sobukhosi, kuthi noma eletha intuthuko, eqe amakhosi okugcina sekudala izinkinga ikakhulukazi uma kunesakhiwo okumele sakhiwe endaweni yayo inkosi.
“Yilapho kugcina sekuthiwa isakhiwo sobukhosi kasihambisani nentuthuko, yingoba kabakwazi ukuxoxisana namakhosi.
“Ngaphambi kokuba yimeya bekuba lula ukusebenza namakhansela ngoba abeqonda ukuthi kumele asebenzisane nobukhosi,” esho.
BESINGESIHLE ISIMO SEMALI KUMASIPALA
Ngesikhathi inkosi ushabalala ithatha esokuba yimeya kumasipala wesifunda, uthukela, bekungabanye bomasipala abebengenzi kahle njengoba kuze kube yimanje ungaphansi kweso lomlawuli.
Uthi efika isimo besisibi kakhulu, umasipala ubucwile ezikweletini kanti futhi bekuphinde kube nenkinga enkulu yezisebenzi ebezingafuni ukusebenza kodwa zimandla ekufuneni ukukhokhelelwa isikhathi eseqile zingasebenzanga.
“Sifike isimo sisibi abantu bengenawo amanzi, umasipala usesikweletini sika-r800 million. Lesi sikweletu besidalwa ngabantu ababenikwa amathenda kodwa umsebenzi bengawenzile.
“Okunye okungidalele isigcwagcwa ezisebenzini, wukuvala ‘umpompi’ ebezithola ngawo imali, zithi zisebenza isikhathi eseqile. Bekuke kube nezisebenzi ezihola imali ephindeke kabili emiholweni yazo kodwa lo msebenzi ezithi ziyawenza ungabonakali,” esho.
Uthi ngemuva kokuthi kuphenywe ngale mali, izisebenzi kazikuthandanga lokho, ngokuthola kwabo ngenye yezinto ebiyenza lo masipala ungabi namali. Kuyimanje uthi sebekhokhe uhhafu wale mali ebeyikweletwa wumasipala.
“Sifike sathi makulandelwe umthetho ukuthi wona uthini, njengoba uthi asikho isisebenzi okumele sisebenze singaphumuli. Ngemuva kokuvala leyo mali, kube sekuqala ukudicilelwa phansi kwengqalasizinda ngoba njalo ngolwesihlanu besazi ukuthi bekuqhuma ipayipi lamanzi ngoba befuna umphakathi ukhale bese beyabizwa, okuyinto esike saba nenkinga enkulu nayo,” kusho ushabalala.
Okunye athi kufike kwaba yinkinga, wukuthi izisebenzi bezihlala zingekho emsebenzini.
Uthi kudingeke baqale phansi babakhumbuze ukuthi njengoba beqashwe wumasipala nje, kabavolontiyi, kepha baholela ukunikeza abantu abangaphansi kwawo amanzi.
Uthi noma bezama ukuyisa intuthuko ebantwini okunye okubashayayo wukuthi ingqalasizinda kayiyinhle, kudingeka imali engango-r3 billion ukuze ilungiswe kabusha.
Njengoba isikhathi sakhe siyoze siphele ngo-2026, uthi angathanda ukuthi akhunjulwe ngemisebenzi afike ayenza, nomehluko awenza empilweni yabantu basothukela namaphethelo.
“Ezinye zezindawo zethu zineziphethu, siqale uhlelo lokuzisebenzisa lezo ziphethu ukuze namanzi siwanikezele ebantwini bakithi sesiwahlanzile ngoba umsebenzi wethu esinikezwe wona ngowokunikezela ngamanzi.
“Kunezindawo ezineminyaka engaphezulu kuka-15 ebezino-mpompi abangaphumi amanzi kodwa lokho sesiyakulungisa. Ngoba imali kasinayo siqala uhlelo lokwakha amapitsi (boreholes) ezindaweni ezahlukene.
“Siphinde sibe nezinhlelo zokuhambela izikole siyonikela ngemifaniswano nangokunye okuhlukile, siphinde sikhuthaze nabafundi ngoba imfundo ibaluleke kakhulu kuthina,” esho.
Ngozibandlela (December), wangonyaka odlule, indawo yasemnambithi ihlaselwe yizikhukhula ezinamandla ezidlule nemiphefumulo yabantu abalinganiselwa ku-26.
Lesi sibhicongo siphinde senza ingcindezi enkulu kwingqalasizinda njengoba inkosi Shabalala ithi amapayipi angenwe wudaka, aqhuma.
“Naleso sibhicongo sisibuyisele emuva kakhulu, kwaphinde kwanezisulu ezilahlekelwa yimiphefumulo yazo ngaleso sikhathi,” esho.
Inkosi Shabalala ihlale esihlalweni sobukhosi ngo-1997, ngemuva kokubanjelwa njengoba uyise akhothama isafunda. Iganwe ngundlunkulu usenzeni Shabalala, umakhumalo, ophinde abe yikhansela kuwona lo masipala.