Uhambela izikole ecija abafundi ngolwazi lwezolimo
Uthi bakhuliswe yisalukazi esasibakhuthaza ukuzikhiqizela ukudla
UKHOLWA wukuthi into oyifundisa ingane, uyikhuthaze ukuhlale iyenza, kwenza ikhule nayo futhi kayiphumi kalula emqondweni wayo. Yingakho umnu Thabani Ngubane, wasemandlanzini, erichards Bay, Kwazulu-natal ongumlimi nomsunguli we-ithuba Agribusiness, esebenzisa ulwazi lwakhe lwezolimo ukukhuthaza abantwana ukutshala ukudla.
Ithuba yinkampani yezolimo egxile ezinhlelweni zokuhambela izikole ezehlukene, ukuyofundisa izingane ngezolimo.
“Nginentshisekelo yokubona abantu abasha bethuthuka futhi bephumelela empilweni, yingakho ngiya ezikoleni zangasekhaya ukufundisa izingane ngezolimo namathuba ahlukene alo mkhakha,” kusho yena.
Usehambele izikole ezihlukene zamabanga aphansi naphezulu zaserichards Bay nasempangeni, okubalwa kuzona ibirdswood Secondary, inhlabane Primary, i-aquadene Secondary, ithakasani Primary, yisikhawini Primary netholokuhle High.
“Kuthi uma ngihambele lezo zikole, kuba nosomabhizinisi nezinkampani ezizimele abangixhasayo ukusiza inkampani yami
ithuthuke, futhi ngizuze ngomsebenzi omuhle engiwenzayo.”
Uthi lusuka kude uhambo lwakhe lwezolimo.
Uthi bakhuliswa yisalukazi esasibakhuthaza nezingane zakwabo ukukhuthalela ukutshala nokuzikhiqizela ukudla.
“Yilokho okwenza ngakhula ngithanda ezolimo, ngaze ngathola ithuba lokufunda ngazo ohlelweni lomnyango wezolimo olwenganyelwe wumasipala wangakithi iking Cetshwayo, olubizwa ngeyouth In Agriculture and Rural Development (iyard), ngo-2011 kuya ku-2013.” Kuthi uma esebacijile ngolwazi abafundi ngezolimo ungubane, abaklomelise ngezitifiketi.
Kwiyard ufunde ngokuqala nokuphatha ibhizinisi lezolimo, waze wakhethwa njengonobhala walolu hlelo ngo-2013, kwathi ngo-2019 waba ngusihlalo wentsha esendimeni yezolimo kumasipala wangakubo.
“Ulwazi (engiluthole) kuyo lungisize kakhulu sengiqala inkampani yami ngo-2021 (kanti) isigunyaziwe nase-agriseta ukufundisa abantu ngezolimo, ngibanike nezitifiketi.
“Ngenye indlela engenza imali leyo ngayo.”
Okwamanje uzibambela konke ebhizinisini.
Ubiza u-r200 no-r350 ukufundisa ngezolimo usuku, kube wu-r1 500 kuya ku-r2 500 izifundo zesonto ezihambisana nokwenza umsebenzi wokufundiswayo.
Uphethe ngokuthi ufisa ukuya naezikoleni zakwezinye izindawo ukufundisa ngezolimo, futhi akhulisa inkampani yakhe ibe ngethe-njwayo ukucija abafisa ukungena kule mboni.