UMQEQESHI WE-BRAZIL UTHEMBISA UKUBUYISA ISITHUNZI SEQEMBU
USELUBALUBELA ukuhlala ebhentshini emdlalweni wakhe wokuqala udorival Junior oqokwe ngomasingana (January) njengomqeqeshi omusha weqembu lesizwe lasebrazil.
Ibrazil izobhekana ne-england kowobungani namuhla ngomgqibelo ngo-21h00 ewembley Stadium, engilandi. Lona kuzokuba wumdlalo wokuqala kulo mqeqeshi selokhu athatha izintambo zokuqhoqhobala lesi sikhundla esifiswa yinqwaba yabaqeqeshi ngenxa yekhono labadlali basebrazil, abalikhulumisayo ibhola enkundleni.
Ekhuluma ngaphambi komdlalo wakhe wokuqala lo mqeqeshi, wehluleke ngisho ukuyifihla injabulo yakhe.
“Sengikubheke ngabomvu ukudlala umdlalo wokuqala. Ngiyazethemba ukuthi ngizokwazi ukusebenzisana kahle nabo bonke abadlali abakhona ukuze iqembu lenze kahle.
“Ngijabule futhi lokho ngeke ngikufihle, wonke umuntu othola leli thuba ngeke angajabuli. Sekunesikhathi ngisebenza namakilabhu amaningi ahlukene, bengilokhu nginethemba lokuthi ngelinye ilanga ngizosebenza kwelesizwe njengoba sekwenzeka manje.
“Okungijabulisa kakhulu wukuthi ngizothola ithuba lokuba ngumqeqeshi eqenjini engikhule ngingumlandeli walo njengoba ngilokhu ngalilandela ngisemncane.
“Engifisa ukukwenza wukubuyisa ithemba kubalandeli asebeqala ukulingabaza iqembu. Ngiyazi ukuthi akuzukuba lula ukukwenza ngaphandle kwabo, yingakho ngidinga ukuba baseseke.
“Sizodlala nabantu abasezingeni lomhlaba futhi abadlala kahle. Banomqeqeshi okhaliphile ugareth Southgate, phezu kwalokho basha-ya ngabadlali abahamba phambili emhlabeni aba-fana noharry Kane nojude Bellingham.
“Ngaphandle kwalokho laba badlali badlala emaligini ahlonishwayo emhlabeni. Nginethemba lokuthi sizoluqala kahle lolu hambo,” kusho lo mqeqeshi.
Ebuzwa ukuthi lisahloniphekile yini iqembu lesizwe lasebrazil, uthe: “Kuyinto ekhathazayo ukuthi sihlonishwa kakhulu emazweni angaphandle ukwedlula lapha ekhaya, yingakho sifuna ukubuyisa uzwano phakathi kwethu nabalandeli.
“Ngikhulumile nabadlali sabonisana ngezinto okumele sizenze ukuze sibe yile nto abantu abayifunayo. Sisenabo abadlali abangasinqobela lonke uhlobo lezicoco.
Esikudingayo nje wukuba sisebenze ngokubambisana. “Nginethemba lokuthi uneymar uzolulama maduze ngoba simdinga kakhulu kuleli qembu. Sifuna ukuwunqoba lo mdlalo njengoba sizicijela imidlalo yecopa America.
“Usuku lwangomgqibelo (namuhla) lubaluleke kakhulu kimina ngakho ngifuna ukuluqala ngokunqoba okuzokwenza sibuyise ithemba kubantu.” Nakuba ekhuluma kanjena lo mqeqeshi kodwa uyazi ukuthi ngeke kube lula kwazise uthathe izintambo leli qembu lingenzi kahle okufakazelwa wukuthi lehlulwe emidlalweni emithathu yokuqala yokuhlungela indebe yomhlaba.
Okuzokwenza lo mdlalo ushube kakhulu wukuthi womabili la mazwe ashaya ngenqwaba yabadlali abagijimela amakilabhu asezingeni eliphezulu emhlabeni.
* Omunye umdlalo obhekwe ngamehlo abomvu ngophakathi kwezinkunzi zase-europe, ifrance negermany ezizogadulisana kowobungani namuhla ngo-22h00.