Ulwela ukululama ngokugcwele ochithwe yibay FC
Usanda kuphothula uhlelo olumqoka lwepsl lokufunda ukuzimela
USHELWA ngamakilabhu agijima kwidstv Premiership umdlali osanda kuhlukanisa ifindo lomshado nekilabhu yakwazulu-natal. Usakhile “Gabha” Hlongwa ongumgadli ohlukane nerichards Bay FC emasontweni ambalwa edlule, kuvela ukuthi useqalile ukuthola izingcingo kwamanye amakilabhu adlala kulesi sigaba.
Lo mdlali ungomunye wababe neqhaza elikhulu ekutheni le kilabhu yenyukele kwidstv Premiership njengoba ebeqhulula amagoli isekwinational First Division (NFD).
Emuva kokunyukela esigabeni esiphakeme udonse kanzima njengoba evele wahlushwa yidolo eliphoqe ukuba ayohlinzwa.
Nangale sizini kube ngesifanayo njengoba ephinde walimala elinye idolo waphinde wahlinzwa. Nokho useluleme, uselwela ukuba qatha ngokugcwele.
Leli phephandaba lithole ukuthi lo mdlali ushayelwe yisekhukhune United, yicape Town
Spurs nechippa United befuna ukuzwa ngesimo sakhe. Kuthiwa bathembise ukubuyela kuyena.
ILANGA Lempelasonto
lishayela lo mdlali - ophothule uhlelo lwepremier Soccer League Transition Programme ibambisene negordons Institute of Business Science (GIBS) ngolwesithathu - uvumile ukuthi akhona amakilabhu aseke amthinta.
“Kuyiqiniso ukuthi akhona amakilabhu kuyona idstv Premiership aseke angithinta efuna ukuzwa ngesimo sami, athembisa
ukubuyela kimina.
“Inkinga wukuthi kwamina kangijahile ngoba ngifuna ukululama kahle njengoba bengilimele.
“Kodwa kona kangingabazi ukuthi ngizoyithola ikilabhu nomphathi wami umandla Mthembu kukhona amatasa ngakho yikhona nje ukuthi kufanele ngilulame kahle,” kusho uhlongwa.
Limubuza leli phephandaba ngalolu hlelo lwepsl ukuthi ulubona luzoba wusizo yini kubadlali uthe: “Ngilubona luzoba wusizo kakhulu ngoba izinto ezifundwayo zimqoka.
“Empeleni sifundiswa ngempilo emuva kwebhola. Ezintweni esifundiswe zona ngingabala ukubhajetha, ukonga imali nokuthi uyisebenzisa kanjani ngendlela efanele imali.
“Sizuze kakhulu ngalolu hlelo, sekukithina njengabadlali ukuthi silisebenzisa kanjani ithuba esilinikiwe lokufunda.”