Seluvuliwe uhlelo lwe-substitution kwabecomrades
Konke kuzokwenziwa YICMA, abasubathi kabavunyelwe ukukhokhelana bodwa ngasese
ABECOMRADES Marathon Association (CMA) bavule ithuba lokugcina kubasubathi abangakwazanga ukubhalisela lo mjaho ngesikhathi kuvuliwe nyakenye.
I-CMA ithi seluvuliwe uhlelo lwayo lwe-substitution lapho abasubathi ababhalisele icomrades kodwa bengeke besakwazi ukuyigijima, ngenxa yezimo ezithile, bekwazi ukudlulisela imingenelo yabo kulabo abangakwazanga ukubhalisa.
Ngokusho kwecma, lolu hlelo luvulwe ngomhla ka-15 kwephezulu kanti kuzovalwa ngo-mhla ka-15 kwezokwethwasa. Abasubathi abangeke besakwazi ukugijima bayacelwa
ukuba bathumele imininingwane yabo kwicma ngaphambi kokuphela kwenyanga.
Kuzokuthi mhla ka-1 kwezokwethwasa ICMA iqale ukwemukela imingenelo emisha, kuze kushaye umhla ka-15.
I-CMA ithi abangeke besakwazi ukugijima bazohlawuliswa u-15% wemali abayikhokhile, bebuyiselwe u-85%.
Umsubathi omusha uzokhokha imali obekubhaliselwa ngayo lo mjaho, okuwu-r1200.
Bayaziswa abagijimi ukuthi lonke uhlelo luzokwenziwa YICMA kakukho mali okufanele abasubathi banikezelane yona.
Umjaho walo nyaka uzokuba mhla ka-9 kunhlangulana (June), usukela ethekwini usongwe emgungundlovu.
Kuthiwa usuku lokugcina ukuthumela izikhathi kulabo basubathi abazobamba iqhaza kulo mjaho wumhla ka-6 kunhlaba (May).
Umjaho walo nyaka ungenelwe ngabasubathi abangaphezulu kuka-22 000 kanti phakathi kwalabo okubhekwe ukuba badle umhlanganiso kwabesifazane kukhona ugerda Steyn, owaba yingqwele kwi-up run ngo-2019, waphinde wanqoba i-down run nyakenye, kubhekwe ethekwini. Kwabesilisa kubhekwe u-edward Mothibi owaba yingqwele ngo-2019 notete Dijana osewunqobe kabili kulandelana (kwehliwa) – ngo2022 nango2023.