Umqeqeshi webafana ubalisa ngokushoda ngonyazi lomgadli
Ngolwesibili bazodlala ne-algeria kowobungani ekuhambeni
UBALISA ngokushoda ngomgadli ongalibheki ipali uhugo Broos (osesithombeni), ongumqeqeshi webafana Bafana ebambane neandorra kuba wu-1-1 kowobungani ngolwesine e-annaba Stadium, e-algeria. I-andorra yiyona ebone imbobo yamapali kuqala ngesikhathi uricard Fernandez Betriu eshaya elihle igoli ngomzuzu ka-5, lacinywa ngelika-elias Mokwana ngoka-23 obeqala ukudlubha ijezi lalesi sikwati sikabroos wasebelgium.
Ubroos utshele abezindaba ukuthi yize ukunqoba bekungabalulekile kangakho, kepha ugculisekile ngabanye abadlali abakhombise ukuzinikela ekubeni bebeqala ukuba yingxenye yesikwati. Uthe njengoba ebeshilo ukuthi bazobhekana neqembu elihlala emuva, kepha abadlali bakhe bakhombise ukuvuthwa. Ukhale ngokwehluleka kwabo ukusebenzisa amathuba abawakhile. “Inkinga enkulu esinayo ngeyokuthi ebholeni laseningizimu Afrika kasinaye umgadli okwazi ukunama-thisela amathuba atholakala enkundleni. Ukuba sinaye ngabe umdlalo we-andorra sishaye inqwaba yamagoli kuwona.
“Sehlulwe cishe ngamathuba awu-7. Ngizamile ukuwunqoba lo mdlalo kepha kwanqaba sona isimo. Sisha lesi sikwati engisisebenzisile kulo mdlalo we-andorra.
“Lokhu kuyisithombe esihle sokuthi emidlalweni elandelayo ezokuba ngonhlangulana (June) kuningi esizokube sesikufundile. “Phela mkhulu umehluko okhona phakathi kwabadlali abagijima kwidstv Premiership nakwamanye amazwe ase-afrika kanjalo naphesheya kwezilwandle. Kube kuhle ukunika abadlali abasakhula isipiliyoni. “Sidinga umdlali ozokwazi ukusebenzisa ithuba elilodwa esilithola enkundleni. Kuncane okungazange kungigculise kulo mdlalo,” esho.
Umdlalo olandelayo webafana Bafana izoshukana kuwona ne-algeria ngolwesibili ebusuku enelson Mandela Stadium, e-algiers.