INKATHA IZOHLONIPHA USHENGE NGOMQULU WEZETHEMBISO ZESIFUNDAZWE ONDINI
USIHLALO wenkatha Freedom Party (IFP) Kwazulu-natal, umnu Thami Ntuli, umemezele ukuthi leli qembu lizokwethula umqulu walo wezethembiso zokhetho wesifundazwe olundi ngenyanga ezayo.
Untuli usho lokhu ngolwesine ngesikhathi ebize isigcawu sabezindaba emahhovisi ale nhlangano, ethekwini, okuyilapho ethule khona amalungu ajoyine I-IFP, esuka kwamanye amaqembu epolitiki
“Amalungiselelo okwethulwa komqulu wesifundazwe asesemaphethelweni. Kuyasithokozisa ukumemezela ukuthi lo mqulu uzokwethulwa ngesonto mhla ka-7 kumbasa (April) eprince Mangosuthu Regional Stadium, olundi.
“Okwenze saqoka ukuwethula kule ndawo yingoba sihlonipha umsunguli weqembu lethu, umntwana umangosuthu Buthelezi, futhi sifuna ukugcina umlando wakhe,” esho.
Uthe lo mqulu uzobe uqukethe izinhlelo zabafisa ukukuzuza nezixazululo zezinkinga ezikhungethe isifundazwe.
“Umqulu kazwelonke weqembu owethulwa emoses Mabhida wazibeka obala izinkinga esizolwa nazo, kodwa kulo esizowethula, sizogxila ezixazululweni zazo lezi zinkinga.
“Eyokuqala nje wukulungisa isizinda somnotho wesifundazwe okuyitheku.
“Uma kulunga itheku, kuzovuleka namathuba emisebenzi njengoba kunenkinga yokungasebenzi
kwentsha,” esho.
Uthe uma I-IFP ingena emandleni kulesi sifundazwe, izophinda yenze imisebenzi emihle njengoba yenza phambilini, ngesikhathi iphethe IKZN.
Uphinde wethula amalungu amasha amukelwe ngokusethethweni eqenjini, asuka kwi-abc, INFP NE-EFF.
“Kuyakhombisa ukuthi imisebenzi YE-IFP iyabonakala njengoba sethula amalungu amasha.
“Iningi lawo belisezikhundleni eziphezulu emaqenjini abekuwo.
“Phakathi kwawo sibala umnu Erickson Zungu obeyilungu LENFP esishayamthetho nonkz Refiloe Ramatlapeng obeyisikhulu SE-EFF esifundeni iharry Gwala.
“Ukuba khona kwakhe kukhomba ukuthi iyaphela le nkoleloze yokuthi izindawo eziseningizimu yesifundazwe ziyisizinda SE-ANC.”
Uthe akangabazi
ukuthi inkatha izosinqoba isifundazwe ngoba umsebenzi ewenzile uyazikhulumela.
Uthe uma kwenzeka bengasithathi, bazimisele ukuxoxisana namanye amaqembu anombono owodwa nabo ukuze basibuse ngokubambisana.