BASHAYA AMAKHALA NGENGOZI YEMOTO EYEHLELE UMSHOLOZI
BASHAYA amakhala ngengozi yemoto eyehlele umnu Jacob Zuma owayengumengameli wezwe, kodwa waphuma engenamyocu.
Okhulumela umkhonto wesizwe Party (MK Party) umnu Nhlamulo Ndhlela uthi uma bebuka zonke izinto ezenzeka kuzuma, nayo le ngozi eyenzeke ngolwesine ntambama, bayasola ukuthi kukhona okushaya amanzi.
Undhlela usho kanjena nje indodakazi kazuma, ududuzile, izolo ngolwesihlanu ibhale kwix (Twitter) yathi: “Ngqongqoshe Bheki Cele, sezibe ziningi emphakathini izinsongo ngempilo kamengameli Jacob Zuma. Sicela uziphenye zonke.”
Undhlela uthi ucele nguyena okumele aqikelele ukuphepha kukazuma, uthi kuyabaxaka nokuthi sekuphele iminyaka eminingi izimoto ezihamba uzuma zingakaze zishintshwe ekubeni ezabanye ababengomengameli sezike zashintshwa. Uthi nakho lokhu kubenza bashaye amakhala.
Ubale nokunye okuyisizathu sokuba babe nezinsolo, okubandakanya namacala aqhubekayo ezinkantolo, nesinqumo SE-IEC sokuchitha ukuphakanyiswa kwegama lakhe (umsholozi) emagameni abaphakanyiselwe ukungena ezikhundleni ephalamende nasezishayamthetho zezifundazwe ngemuva kokhetho lwangomhla ka-29 kunhlaba (May) kulo nyaka.
Isigameko sale ngozi okubikwa ukuthi yenzeke emgwaqweni u-r66 ngaseshowe, siqinisekiswe ngubrigadier Athlenda Mathe
okhulumela amaphoyisa kuzwelonke.
Umathe ubike ukuthi uzuma ubehamba nabaqaphi bakhe ngesikhathi imoto yakhe ishayisana nenye ebihamba owesilisa oneminyaka elinganiselwa ku-51.
Lo wesilisa uboshelwe icala lokushayela edle amponjwana, nelokushayela budedengu, kanti kakunamuntu olimele kule ngozi.
Ubrigadier Mathe uthe umsolwa uzovela ngolwesibili enkantolo yemantshi yaseshowe.