UBOSHWE ESALASHWA E-CLINIC 'ODUBULEKE' KUBULAWA OQAPHA UMPHAKATHI
UBANJWE esemtholampilo eyofuna usizo osolwa ngokudubula abulale ilungu leneighbourhood Watch Kwamashu.
Kulesi sigameko esenzeke ezintathakusa ngomsombuluko, kubulawe umnu Siyabonga 'Bravo' Shange (42) okuthiwa udutshulwe amahlandla amaningi wabulawa ngowesilisa esemsebenzini wokuqapha umphakathi kuleli lokishi.
Kuthiwa umbulali uqonde kuyena wavulela ngenhlamvu. Nokho kuthiwa umufi ukwazile ukuphindisela njengoba umsolwa egcine edubuleka. Leli phephandaba lithole ukuthi umsolwa ubalekile kanti uzoya emtholampilo khona Kwamashu eyofuna usizo, lamshonela njengoba kuthiwa abakwasidlodlo bamshaqe khona.
Umthombo WELANGA Lempelasonto ongaphakathi ohlakeni lweneighbourhood Watch, uthi basola ukuthi inhloso yokubulawa kukashange wukusebenza kwakhe ngokuzikhandla elwisana nobugebengu. Uthi bekungekhona okokuqala ehlaselwa ushange njengoba nangonyaka odlule wahlaselwa ezama ukuvikela umuntu owayebanjwa inkunzi.
“Ushange ubesemsebenzini wokuqapha umphakathi kuzosa kube wumsombuluko. Kube sekuqhamuka abantu abafike bamdubula. Ngaleso sikhathi ubeyedwa kule ndawo abeqaphe kuyona. Uzamile ukulwa njengoba oyedwa wabahlaseli bakhe edubulekile.
“Amanye amalungu eneighbourhood Watch athole umbiko ngokuhlaselwa kwakhe aphuthuma endaweni yesigameko. Elinye ilungu lithe selizofika endaweni yesigameko lahlangana nowesilisa ovele wadonsa isibhamu wazama ukulidubula kodwa isibhamu sangavuma. Lona wesilisa siyasola ukuthi ungomunye walaba abahlasele ushange,” kusho umthombo.
Uthi kube khona amalungu omphakathi abone owesilisa egibela itekisi elimele okube sekusolisa kwabe sekuthintwa amaphoyisa.
“Amaphoyisa anikele emtholampilo lapho efice khona umsolwa, okuthe uma ebuzwa ukuthi ulinyazwe yini wankwankwaza. Kuthiwa amaphoyisa athole nobunye ubufakazi obebuqinisekisa ukuthi uyathinteka ekudutshulweni kukashange, zamkhalela khona elimele,” kusho umthombo.
Umnu Andile Jali ongusihlalo weneighbourhood Watch ethekwini namaphethelo, ukuqinisekisile ukubulawa kukashange. Uthi iyabakhathaza indaba yokwanda kwezigameko zokubulawa kwamalungu abo ekubeni alekelela kakhulu ekugadeni umphakathi.
Uphonsele inselelo umasipala wetheku ukuba ungenelele ukuzama ukulwisana nalesi sihlava njengoba ethi nawo uyazuza ngokuba khona kwabo emphakathi.
“Umsebenzi owenziwa ngamalungu ethu mkhulu emphakathini, ngisho nawo umasipala uma kunenkinga kagesi odinga ukulungiswa, uyaye ushayele thina ukuba sigade izisebenzi zawo ebusuku ezisuke zizowulungisa. Lokhu sikwenza ngokuzimisela ngoba umsebenzi wethu wukugada umphakathi.
“Lokhu kuba wusizo nakumasipala ngoba ngisho izivakashi zizizwa ziphephile ngoba siyalwisana nobugebengu. Siyadinga ukuba nohulumeni ungenelele kule nkinga ikakhulukazi umasipala,” esho.
Okhulumela amaphoyisa Kwazulu-natal uconst Thenjiswa Ngcobo, usiqinisekisile lesi sigameko, wathi kuvulwe icala lokubulala kanti ukhona umsolwa oseboshiwe.