Kusolwa umbango wobunsizwa kudubulana onogada
Okhulumela umasipala uthi abafi bebehlala bexatshaniswa wubala
KUSOLWA umbango wobunsizwa oholele ekufeni konogada abayizethenjwa zezikhulu zikamasipala umhlathuze, erichards Bay, ngezithuba zasekuseni ngolwesine.
Kuthiwa besekuphele izinyanga ezine yaziwa ingxabano yalezi zisebenzi njengoba besekuyisikhathi eside umnu Ntokozo Mthembu ongunogada wemeya yalo mkhandlu umnu Xolani Ngwezi, ekhala ngokubukelwa phansi ngumnu Senzo Zulu ongunogada wemenenja yawo lo masipala, umnu Nkosenye Zulu ongusingayise (stepfather) kasenzo.
Ngosuku lwesigameko leli phephandaba lihambele emahhovisi alo mkhandlu, okuyilapho lithole khona ukuthi umasipala uvaliwe. Ingxenye yezisebenzi zawo ezitholakele bezibukeka zinosizi futhi zidangele ngokwenzekile.
Engxoxweni yaleli phephandaba nomnu Bongani Gina okhulumela lo masipala, uthi umkhandlu ucele inhloko ebhekelele ezokuphepha kuwona umnu Phakama Mhlongo, ukuba ihlanganise lezi zisebenzi ngenhloso yokuthola isixazululo enkingeni yazo yokungaboni ngaso linye.
Kuthiwa umthembu ubengekho emsebenzini ngosuku lwesigameko. Kuthiwa ufike ngoba kuzokhulunywa udaba lwabo. Kuthiwa kuthe uma efika kwenzeka okujwayelekile phakathi kwabo, emuva kwalokho wadinwa, wadonsa isibhamu wadubula uzulu amahlandla amaningi phambi kozakwabo, emuva kwalokho waphuma ngomnyango.
Kuthe esasezitebhisini ezingaphakathi esakhiweni salo mkhandlu, omunye wonogada bemenenja yomkhandlu wamjaha wamdubula naye, washonela endaweni yesigameko.
Ugina uthi besekuyisikhathi eside lwaziwa udaba lokungaboni ngaso linye kwabo. Ukuphikile ukuthi bekubangwa owesifazane.
“Bebevele babange into encane emuva kwalokho kusuke ingxabano. Untokozo ubehlala ekhala ngokuthi usenzo akamhloniphi ekubeni emdala kunaye. Kakulona iqiniso ukuthi bekubangwa intombi kodwa bekuwukungaboni ngaso linye. Kuzwisa ubuhlungu ukuthi kunabantu asebethole into yokugiya nokugxeka ngokwenzeka kwalesi sigameko.
“Elinye lamaqembu likhiphe isitatimende lithi umthembu uyinkabi YE-IFP okuyiyona ephethe lo mkhandlu. Kushiya imibuzo ukukhuluma okunjalo ngoba I-IFP ingene kulo mkhandlu evele ekhona umthembu, wayevele egada imeya eyayikhona phambilini umnu Mduduzi Mhlongo.
“Esingazi-ke noma baqonde ukuthi iqembu elalikhona yilona elaqasha inkabi. Sibuzwile ubuhlungu ngokwenzekile futhi kwenzeka phambi kwezisebenzi ngaphakathi esakhiweni somkhandlu,” kusho ugina.
Uthi kakulona iqiniso ukuthi isigameko sidalwe wukungaboni ngaso linye phakathi kwemeya nemenenja yomkhandlu.
Usihlalo wesalga Kwazulunatal umnu Thami Ntuli obuye abe yimeya yaseking Cetshwayo engunina womhlathuze, uzwakalise
ukudabuka ngokwenzekile.
“Sishaqekile uma sithola imibiko ngokwenzeka kwesigameko. Sizoxhumana nobuholi bukamasipala ukuze sithole imininingwane ngaso. Sidlulisa amazwi enduduzo emindenini elahlekelwe ngamalungu ayo,” kusho untuli.
Okhulumela amaphoyisa Kwazulu-natal ult-colonel Robert Netshiunda uthe amaphoyisa aserichards Bay aphenya amacala amabili okubulala kulandela isigameko sokudubulana esenzeke emahhovisi omkhandlu umhlathuze.
“Maqondana nalesi sigameko kakukaboshwa muntu,” kuphetha unetshiunda.