BASALE NEMIBUZO 'INYATHI IBULALA' ILUNGU LOMPHAKATHI
ASALE nemibuzo amalungu omphakathi owakhelene nesiqiwi ihluhluwe imfolozi Park ngasemashiya, kulandela isigameko sokufa ngesihluku kowesilisa okuthiwa uhlaselwe yinyathi.
Kubikwa ukuthi lesi sigameko sishiye amalungu omphakathi ethuthumele njengoba le nyathi iqale ngokugcaluza emphakathini ngaphambi kokuba ihlasele ibulale lona wesilisa.
Isikhulu sezemvelo KZN Wildlife, umnu Sihle Mkhize, sidlulise amazwi enduduzo emndenini wesisulu.
“Ngizwakalisa ukudabuka ngokuthi kugcine kuphuma umphefumulo ngenxa yokucanasa kwale nyathi,” kusho yena.
Unxuse ukuthi lesi sigameko sibe yisifundo kumalungu omphakathi owakhelene nesiqiwi.
Uqhube ngokuthi banemigomo eqinile ebekiwe ukuqinisekisa ukuphepha kumalungu omphakathi ezilwaneni zasendle.
“Ngeshwa phezu kwayo le migomo, izigameko ezishaqisayo ziyaqhubeka nokwenzeka ukusikhumbuza ukuthi kumele sihlale simehlo mane.”
Uqhube ngokuthi basebenza ngokubambisana nezinhlaka zomthetho ukuqinisekisa ukuthi uphenyo luhamba kahle futhi kufinyelelwa ngokushesha esixazululweni salolu daba.
“Ithimba lethu lizimisele ukufunda kulesi sigameko ukuze sigwemeke ngokuzayo.”
Umkhize uveze ukuthi akulula ukuthi basheshe bagagule ukuthi kwenzekeni nokuthi iphume kanjani le nyathi esiqiwini.
Esitatimendeni, abezemvelo baveze ukuthi muva nje babhekene nezingqinamba zokulwa nalabo abahlasela izilwane ngokungemthetho ikakhulukazi obhejane, abanqamula izingcingo okubiywe ngazo iziqiwi, ukuze bengene ngaphakathi.
Baphinde badalula ukuthi bakhona abaqaphi ababhekelela ukuvikelwa kwezilwane kodwa ngeshwa, kabakwazi ukuba khona yonke indawo.