Ingcuphe yomdlavuza wenduku kwabangasokile
Ikakhulukazi kulabo abangaziphethe kahle, abajwayelwe yizifo zocansi
ININGI uma licabanga ngokusoka, liye licabange ukuthi lenzela abesifazane ukuba bathokoze ngokweqiniso uma kuyiwa ocansini, kodwa lokho kakulona iqiniso. Lena yindlela yokuthi kube nenhlanzeko endukwini, unciphise amathuba okutheleleka ngezifo, nokuvikela owesifazane. Namhlanje sizofunda ngokubaluleka kokusoka nokuthi kuyini.
KUYINI UKUSOKA?
Ukusoka wukusika noma ususe ijwabu lenduku. Lapha sizokhuluma ngezizathu zokusoka ezithinta isakhiwo (anatomy) senduku kuphela, hhayi ezosiko noma ezenkolo.
IZIZATHU EZIJWAYELEKILE ZOKUSOKA YILEZI:
* Ukuzikhethela ngoba unesifiso;
* Ukulandela izeluleko zabezempilo ngoba bezama ukunciphisa amathuba nokubhebhetheka kwezifo ezigcina zinengozi empilweni yabesilisa, futhi nokuzelapha kube nzima, kubize kakhulu.
Njengalezi, IHIV, iherpes, ighonorrhea (drop) nezinye.
* Ukungabi bikho kwenhlanzeko: ukungcola kwakhelana ngaphakathi ejwabini kuqaqele ikhanda lenduku, uma ijwabu lingavulwa ligezwe bese liphinde livalwa.
Kulula ukuthi amagciwane abe kulokho kungcola, aphinde abe naso sonke isikhathi sokulimaza isikhumba.
* Umdlavuza wenduku: uma ijwabu lingahlanzwa, nomnikazi walo ejwayele ukuba nezifo zocansi, amathuba okuba nomdlavuza wenduku aphezulu.
Wumdlavuza omubi-ke lo ngoba uyayidlavuza uyiqede induku ngaphambi kokusabalalela ngenhla, ukhubaze sonke isingezansi.
Ngakho uma unesilonda nje endukwini, ungahlali naso, shesha uphuthume kwabezempilo silashwe. Uma usheshe watholakala, kulula kakhulu ukuwunqanda, impilo iqhubeke kahle.
SINJANI ISIMO ESIFANELE SEJWABU?
Ijwabu kumele lizungeze ikhanda lenduku lonke, bese liba lula ukulehlisa ulenyuse, okwesokisi ulikhuphula ulehlisa emlenzeni.
NGONJANI UMUNTU OKUMELE NAKANJANI ASOKE?
Uma unejwabu elinembobo encane eliqinile, elingehliseki, likhumuleke (phimosis), noma kanjani udinga ukusoka.
Ngoba ziningi izimo ezingaba umphumela walokhu kungehliseki kwejwabu ezingaba yingozi ngokuhamba kwesikhathi.
Njengokuthi uma uchama, umchamo uphume kancane, kufutheke ijwabu libe sabhaluni njalo uma uchama, bese lilokhu lincipha-ke kancane njengoba umchamo uphumela ngaphandle, noma uze ukhanule imbala ukuze umchamo uphume wonke.
Lokhu kuziveza kusukela umfana emncane, uma engasoki, kuba nezifo zomchamo, uhlezi ushisa, bese kushintsha kulimale isinye, nezinso imbala ngokuhamba kwesikhathi. Ngakho okungcono soka.
Uma ijwabu lakho lehliseka kodwa kanzima. Ngaso sonke isikhathi uma ugeza noma wenza ucansi, phinda futhi usheshe ukulenyusa livale, ungaliyeki liphansi.
Lokhu kwenza livuvukale sabhaluni, linsinye ikhanda lenduku, lize liqhekeke libe nesilonda imbala.
Uma uzithola seliqala noma selivuvukele sabhaluni lingasenyuseki, phuthuma esikhungweni sezempilo ungahlali, ngoba unamahora athile okulungisa lesi simo ngaphambi kokuthi liqhekeke libe nesilonda.
Uma isimo sakho senhlanzeko noma ukuziphatha kwakho kwezocansi wazi kubudedengu, soka.
NGUBANI OKUNGAMELE ASOKE?
Uma ijwabu lakho lingaphelele, lingazungezi induku yonke, lisakepisana ngenhla kuphela,
ngezansi kunegebe.
Bonana nabezempilo kuqala bezokuhlola, bakweluleke ngaphambi kokuqhubekela phambili.
Uma induku ingami iqonde uma iqina kodwa igoba sakubheka phansi. Nawe, bonana nabezempilo kuqala. Lokhu kuvame ukuziveza kwasebunganeni.
Uma ijwabu liphelele kodwa ikhanda lenduku lingenayo imbobo esekugcineni, kunalokho iyigebe elehlele ngezansi endukwini, kwesinye isikhathi imbobo ikuso qobo isiqu senduku ngaphansi, ilishiyile ikhanda.
Nalona udinga ukubonana nabezempilo ngokushesha kuqala, ungakenzi lutho.
Lezi yizimpawu zokunye okungahambi kahle okudinga ukulungiswa, futhi okudinga ubuchwepheshe obuthe xaxa ukulungiswa.
Uma ungenaso isiqiniseko, udinga ukuhlola ubone ukuthi konke kumi ngomumo yini. Kusukela kwabancane kuze kufike kwizimpunga imbala.
Udkt Pepu utholakala ethe Line Men’s Clinic, ehillcrest. Ungaxhumana naye ku- 073 679 9176 ukwenza i-appointment.