I-RAF MAYENZIWE ISIBONELELO SIKAHULUMENI
MHLELI: Impela wayeqinisile lo owathi ifa leziwula lidliwa yizihlakaniphi. Ngithintwa wudaba oluvele kuleli sonto oluthi inkantolo enkulu yasepitoli isichithile isicelo sokuthi iroad Accident Fund (RAF) iyeke ukukhokhela abantu abasuke bekuleli ngokungemthetho, uma beba sezingozini zomgwaqo.
Iyaxaka-ke into enjalo ngoba imali ekhokhwa YIRAF yintela yezakhamizi zaseningizimu Afrika, eziwuthobelayo umthetho.
Okokuqala nje; ukuba kwelinye izwe ngaphandle kwemvume kuwukwephula umthetho. Umuntu owenza okuphambene nomthetho 'uyisigebengu' kuyaphoqa ukuthi ashushiswe.
Izwe libhekene nenkinga yobubha nokwanda kwezindleko zokuphila, ingxenye yakho edalwa wukwenyuka kwentengo kaphethiloli. Ukwenyuka kukaphethiloli kwenza kwenyuke izindleko zezokuthutha, ukudla nezinye izidingo zempilo.
Ingxenye yemali ekhalisayo yentengo kaphethiloli ithathwa yiyona IRAF, okusho ukuthi wonke umuntu oyisakhamuzi sakuleli uyaphonsa esivivaneni kulesi sikhwama.
Kawukwazi-ke ukuthi ungathatha leyo mali uyinike abantu abangafaki lutho enteleni eqoqwa wuhulumeni. Impela sengathi kumele ibukisiswe indaba yezinkantolo zakuleli nomthetho walapha obonakala umelene nezakhamizi.
Ngo-2010, IRAF yakhokhela umlisa waseswitzerland imali engaphezulu kuka-r500 million, ngemuva kokuba sengozini yomgwaqo ehamba ngesithuthuthu.
Kangicabangi ukuthi ukhona oyisakhamuzi sakuleli owake wathola imali engaka, noma ecishe iyele kuyo. Kakusizi ukuthi silokhu sibhuqwa ngabezizwe ngokuthi sinomthethosisekelo (constitution) osezingeni lomhlaba kodwa obonakala uvuna kakhulu abokufika.
Ngale kokuthi imali YERAF yimali yombuso; yini kahle-kahle oyixoxayo, uze uye ezinkantolo nomuntu okuleli ngokungemthetho?
Kuningi okwenzeka kulesi sikhwama, okunye kwakho okuhambisana nenkohlakalo, kodwa kangizukugxila kukhona, ngishaya yona le yokuthi abokufika bazitamuzele imali yethu sibhekile.
Uhulumeni kumele uyibuyekeze indaba YERAF nendlela lesi sikhwama esisebenza ngayo. Nginesixazululo sayo yonke le mbudane: uhulumeni mawuvele uyishintshe IRAF ibe yisibonelelo sikahulumeni, kwenziwe njengesabakhubazakile (disability grant).
Lokhu kuzokwenza isiqiniseko sokuthi wonke umuntu ohlomulayo uqala adlule emnyangweni wezasekhaya, kuhlolisiswe izinto ezifana nomazisi nezimvume zokuba kuleli.