Akunathemba ngethimba ‘elizokhuculula itheku’
Bathi konakale phambi kwemeya yedolobha nondunankulu wasekzn
AMAQEMBU epolitiki aphikisayo ethekwini kawakholwa wukuthi kukhona umehluko ozodalwa yithimba eliyisipesheli likamengameli wezwe umnu Cyril Ramaphosa, okuthiwa lizolungisa izinkinga zetheku.
Athi futhi leli thimba uramaphosa athi uselisungulile, belingakaze libikwe ngokusemthethweni nasemkhandlwini wetheku.
Ngokusho kukamengameli, leli thimba lizobe liholwa ngunkk Phindile Baleni ongumqondisijikelele ehhovisi likamengameli, ebambisene nomnu Michael Mabuyakhulu owake waba ngungqongqoshe wezokuthuthukiswa komnotho nezokuvakasha Kwazulu-natal, undunankulu wesifundazwe unkk Nomusa Dubencube, nemeya yetheku umnu Mxolisi Kaunda.
Umnu Thabani Mthethwa ohola idemocratic Alliance (DA) ethekwini, uthe bona balithatha njengento engekho leli thimba ngoba kalikaze lethulwe ngokusemthethweni emkhandlwini. Nakuba beke bezwa imeya iphawula kancane ngalo.
Uthi beyida kade besho ukuthi makungenelelwe kulethwe uguquko ethekwini.
Umthethwa uthi cishe okungasiza wukuba kusetshenziswe isigaba 139, somthethosisekelo ogunyaza ukuba kuqokwe umlawuli ozophatha umasipala.
Njengoba kuleli thimba eliyisipesheli kukhona nayo imeya, umthethwa uthi kababoni lizoza nomehluko njengoba linomuntu othathwa 'njengohlulekile ukuhola itheku'.
Umholi wenkatha Freedom Party (IFP) ethekwini, umnu Mduduzi Nkosi, naye uthi akakhumbuli leli thimba lethulwa ngokusemthethweni emkhandlwini wetheku. Uthi njengoba kukhona nemeya kulona, bayazibuza ukuthi mnikelo muni ezowenza ekulungiseni isimo sasethekwini njengoba vele ithathwa njengomuntu owehlulekile wukulungisa isimo sedolobha.
Uthi bayazibuza nokuthi yena undunankulu wesifundazwe yikuphi azosiza ngakho kuleli thimba ngoba izinto zonakale ekhona futhi eyisakhamuzi sasethekwini. Ugcizelela ukuthi into esemqoka kakhulu ekulungiseni isimo sasethekwini wukwethembeka, kuphunyelwe obala ngomnyombo wezinkinga.
“Ngicabanga ukuthi wonke umuntu angajabulela noma yiluphi usizo lokungenelela ethekwini kodwa kudingeka iqiniso,” kusho unkosi.
Uthi kufanele kukhulunywe iqiniso ngokuthi yini ngempela inkinga yasethekwini - wathi uma kungaphunyelwa obala ngomnyombo wezinkinga, imizamo yokungenelela ngeke iphumelele.
Naye uveze umbono wokuthi akakholwa wukuthi kukhona usizo imeya ezoba nalo kuleli thimba likamengameli, kodwa ezokwenza wukuzama ukuzivikela uma kwenzeka iminwe ikhomba ngakuyona ngezinye izinkinga zasethekwini.
Uramaphosa uthi leli thimba lizogxila kakhulu ekubhekaneni nezinselelo zetheku njengenkinga exakile yokuphakwa kwamanzi,
wukuwohloka kwengqalasizinda, nendlela osebenza ngayo umasipala. Uramaphosa uthi inhloso wukuguqulwa kwesimo setheku esingesihle, likwazi ukuphinde ligqame, libuyelwe wudumo lwakuqala.
“Ngifuna leli thimba lingibikele njalo ngemuva kwamasonto amathathu, lingitshele ukuthi silimisa kanjani itheku, nokuthi sibhekana kanjani nezinselelo zasethekwini.
"Leli yithimba elizovuselela kabusha itheku, liphucule isimo sechweba lasethekwini,” kusho uramaphosa.
Uramaphosa waqala ukukhuluma ngaleli thimba
ngasekupheleni kukanhlolanja (February) nonyaka, njengoba ephinde wamemezela ngalo futhi ngolwesine.
Ngonyaka odlule kwavela ukuthi kuthathwe isinqumo sokuletha ithimba lochwepheshe eliqokwa ngokwesigaba 154, somthethosisekelo wezwe, ebelizolungisa izinkinga ethekwini.
Lelo thimba kwathiwa lizoholwa ngudkt Cassius Lubisi owayengumqondisi jikelele ehhovisi likamengameli wezwe, nokho yabuye yaphelela emoyeni indaba yalo.