UTSHALOMALI LULETHE ITHEMBA EMNOTHWENI
UTSHALOMALI lwakamuva olufakwe Kwazulunatal, kubhekwe ukuba luthele izithelo ezizofukula umnotho wesifundazwe nowezwe, luthuthukise nomphakathi ngokudala amathuba emisebenzi.
Lolu tshalomali lufakwe yizinkampani ezahlukene itetra Pak, nenewlyn Group. Umengameli umnu Cyril Ramaphosa, ethula isakhiwo esisha sefemu yokukhiqiza yasetetra Pak, ebinwetshwa epinetown, uthe: “Ukunwetshwa kwale femu kukhombisa ukuthi iningizimu Afrika inazo ngempela lezo zinto eziyenza ibe yindawo eheha abatshalimali.”
Uramaphosa uthe utshalomali olufakwe ekuthu-thukisweni kwale femu lunegalelo elikhulu eku-khuleni komnotho okudingekayo ezweni nakwazulu-natal. Uthe le ngqalasizinda izolekelela nasemizamweni kahulumeni yokusungulwa kwamathuba emisebenzi.
Itetra Pak ikhiqiza amakhathoni afaka ukudla, okubalwa awobisi nezinye iziphuzo. Ngaphambi kokuba uramaphosa avule isakhiwo esisha etetra Pak, uqale wavula ngokusemthethweni enye ingqalasizinda yesikhumulo sezitimela ezithwala impahla, inewlyn Park Bayhead Rail Terminal, ethekwini.
Le ngqalasizinda ibandakanya nesakhiwo esikhulu esisha, esigcina impahla esuke ifika, ivela kwamanye amazwe noma esuke iphuma kuleli izohanjiswa ngemikhumbi kwamanye amazwe. Kukhona futhi nojantshi besitimela.
Uramaphosa uthe lesi sikhumulo sizokwenza kube lula ukuthuthwa kwempahla efikela echwebeni, ihanjiswe ngojantshi nasemgwaqweni. Ubike nokuthi zingaphezu kwenkulungwane izisebenzi eziqashiwe kule ndawo.
Kubikwa ukuthi lolu tshalomali luyingxenye yohlelo lukaramaphosa olunxenxa ukuba osomabhizinisi batshale imali kuleli ukuthuthukisa umnotho.