Usezibeka phansi izintambo umethuli wezindaba KUSABC 1
Uvalelise kubabukeli ekhasini lakhe lefacebook
USETHI khumu umethuli wezindaba zesizulu KUSABC 1, unkk Noxolo Mwali, umamtshali, ngemuva kweminyaka ewu-15 efunda izindaba kulesi sikhondlakhondla somsakazeli womphakathi.
Le ntokazi iqale ukufunda izindaba ESABC ngo-2009, ifunda izindaba zezingane, yakhula yabika isimo sezulu, njengoba igcine isifunda ezasemini nezasebusuku.
Kuthe ngonyaka odlule yethula uhlelo lwamahora amane lwasekuseni olusihloko sithi: Ekhaya Jikelele, oludlala KUSABC Channel 404.
“Kayikho into ebengiyithanda njengokufunda izindaba zesizulu, ukuqhakambisa ulimi lwethu.
“Ngifunde lukhulu, ngakhula njengomethuli wezindaba,” kusho umbhalo ekhasini lakhe lefacebook, etshela ababukeli ukuthi ngomhla ka-27 Ndasa (March) bekuwusuku lwakhe lokugcina efunda izindaba kulesi siteshi.
Uveze ukuthi kumephule inhliziyo ukumemezela ukuthi ubegcina ngenyanga eyedlule.
“Ngebhadi yonke into iba nesiphetho. Ngiyabonga kwabakwasabc ngethuba (abanginike lona),” kuchaza yena. “Nginithanda kakhulu sizwe sikaphunga nomageba, nalabo abangasikhulumi isizulu, abebengilalela yize bengaqondi ngisho elilodwa igama engilishoyo. Unkulunkulu anibusise, futhi unami nakulesi sikhathi, ngiyamethemba.”
Yize uveze izindaba zokuthi useyashiya ukufunda izindaba ESABC, akakuvezanga ukuthi useyosebenza kuphi.
ILANGA Lempelasonto lizamile ukuxhumana naye ukuze lithole kabanzi ngokushiya kwakhe, waphendula kanje: “Umoya wami kawumuhle kahle namhlanje, ngicela ningithumelele imibuzo khona ngizoyiphendula,”.
Imibuzo athunyelelwe yona kuze kwashaya isikhathi sokushicilela zingakabuyi izimpendulo zayo.