ODOKOTELA BATHI KABASAZETHEMBI IZITHEMBISO ZIKAHULUMENI
KABENEME odokotela ngokuthi ungqongqoshe wezempilo Kwazulu-natal, unkz Nomagugu Simelane, uye kwabezindaba engaxoxisananga nabo.
Udkt Siphesihle Mlambo osekomidini lodokotela abangasebenzi uthi: “Ukhulumile ezindabeni kodwa akakaze ahlangane nathi, futhi akushoyo akuhambisani nokushiwo yinhloko yomnyango, udkt Sandile Tshabalala,” esho.
Uthi emhlanganweni ababe nawo ngolwesibili, kabazange bagculiseke ngezimpendulo abazitholile, yingakho bezoqhubeka nokuhlala enatalia, emgungundlovu njengoba beqale ukuqhinqa khona kusukela ngolwesibili ekuseni, bachitha ubusuku khona.
“Kunyakamali omusha, bathembisa ukuthi kuzoba nemali ezokwengezwa emnyangweni wezempilo, ukuze kuqasheke odokotela, manje sebethi isifundazwe kasinayo imali, bathole ukuthi banesikweletu sika-r2.9 billion sonyakamali owedlule.
“Akekho ozimisele ngokuphendula ukuthi siyaqasheka yini noma cha.
“Kasisabethembi, yingakho sizoqhubeka sihlale size sithole inkulumo eqondile,” echaza.
Uthi bafisa ukusuka enatalia sebazi ukuthi inqubo abazoyisebenzisa yokuqasha seyikuphi. “Uma bethi bayazikhangisa izikhala zomsebenzi, sizofaka izicelo sihleli khona enatalia, noma iyiphi inqubo ezoqala, sizoyiqala sihleli khona,” esho.
Uthi njengamanje bawu- 65 odokotela abanabo abangaqashiwe.
Lo mbhikisho ulandela owangomhla ka-12 kunhlolanja (February) lapho abanika khona umnyango wezempilo amasonto amabili ukuba uphendule, kepha wangabaphendula.
Baphinda babhikisha futhi mhla zimbili kundasa (March), okuyilapho begcine bexoshwa ngamaphoyisa ebusuku, abakhiphela ngaphandle kwebhilidi.
Ekhuluma ngokuqhinqa kodokotela ubusuku bonke enatalia, ungqongqoshe Simelane uthe, kuyishwa ukuthi odokotela bagcine belale ngaphandle ngenxa yokuthi kabakwazanga ukuhlangana nodkt Sandile Tshabalala obematasa neminye imisebenzi kahulumeni.
Uthe ezingxoxweni zabo, bavumelene ukuthi kunezikhala eziningi ezingenabo odokotela, kodwa ngenxa yokuthi imali kayenele kwenza kube nzima ukuqasha bonke odokotela.
Uthe ngolwesithathu bewumnyango bavumelene nodokotela ngokuthi bazokhangisa izikhala, baqashwe.
Ngokujwayelekile isibhedlela ngasinye kuba yisona esizikhangiselayo, siqashe odokotela kodwa uthi kulokhu kuzokwenziwa yihhovisi likadkt Tshabalala, kulandelwa imigudu efanele.