‘MAYITHATHELWE PHEZULU EYOKUNUKUBEZWA KWABESILISA’ - OYOMELA ELAKULELI EDUBAI
THANDOLUHLE NGUBO
LITHOKOZISWE wukuthola ithuba eliyingqayizivele ibhungu lasemgungundlovu, elithole isimemo sokuba yisikhulumi engqungqutheleni ibest Diplomat Conference, ehlelwe yi-united Nations Educational, Scientific and Cultural Organization (UNESCO), ezoba sedubai, ngomhla ka-17 kuya ku-21 kunhlaba (May) nonyaka.
Umnu Lusanda Sikhakhane (20) (osesithombeni) utshele leli phephandaba ukuthi lesi simemo usithole ngenxa yomsebenzi wakhe awenza ngenhlangano yakhe engenzi inzuzo, ithe LES Foundation, egxile ekugqugquzeleni abantu besilisa abake baba yizisulu zokunukubezwa ngokocansi ukuba baphumele obala ukuze bathole usizo olufanele, mahhala.
“Ngo-2022 nganquma ukusungula le nhlangano ngenhloso yokusiza abantu besilisa abayizisulu zokudlwengulwa.
“Ngeke sikubalekele ukuthi lena yinkinga eyenzekayo lapha eningizimu Afrika, kodwa enganakekile ngoba isikhathi esiningi izigameko zokudlwengulwa zinakeka kwabesifazane nezingane.
“Uma laba besilisa sebephumele obala, siyaye senze yonke imizamo yokuthi bathole usizo ezinhlakeni ezifanele,” echaza.”
Uthi inhlangano yakhe ibambisene kakhulu nomnyango wezokuthuthukiswa komphakathi, Kwazulu-natal, nezinye izinhlaka ezifaka phakathi abeluleki bengqondo njengoba isehlo sokunukubezwa siyihlukumeza ingqondo, okwenza ezinye zezisulu zigcine sezinodlame.
“Okuhle ngale nhlangano wukuthi kunosonhlalakahle esisebenzisana nabo esibahlinzekwa wumnyango wezokuthuthukiswa komphakathi, nabeluleka ngokomqondo. Kuba sesisulwini ukuthi sithanda ukuqale sibonane namuphi kulaba, kanti izisulu kazikhiphi mali ngokubonana nabo,” kusho usikhakhane.
Uthe isimemo sokuba yingxenye yale ngqungquthela simthokozise kakhulu njengoba ezoshiyelana inkundla nabanye bakwamanye amazwe.
Uthi inkulumo yakhe izobe igxile kakhulu kukhona ukunukubezwa kwabantu besilisa.
“Uma ngibheka ohlwini, yimi ngedwa ozobe emele iningizimu Afrika. Ngizobe ngikhuluma ngakho lokhu engikwenza kwi-foundation ngoba kungenye yezinto ezigcina zidale obunye ubugebengu uma zingalungisiwe.
“Kwesinye isikhathi uthola ukuthi omunye usenukubeza abanye ngenxa yesilonda esingalaphekile, esingaphakathi kuyena, omunye abe nolaka nasezinganeni zakhe uma eshadile, okuholela ekwandeni kwamacala odlame lobulili,” echaza.
Usikhakhane uthe konke sekumi ngomumo ohambweni lwakhe njengoba zonke izindleko zohambo zikhokhelwe yizinhlangano i-aurum ne-uthingo Network, ezingezinye zalezi ezilekelela ngosizo lwezomqondo enhlanganweni yakhe.
Uthi unethemba lokuthi le nkinga yokunukubezwa kwabesilisa izogcina ithathelwa phezulu njengezinye kuleli.