Kwethulwe izimoto kwabecpf ukulwa nobugebengu
UPHENDUKE inkundla yokugayela uhulumeni wasekzn ivoti umcimbi kahulumeni wokwethulwa kwezinsiza emalungwini ezinhlaka zezokuphepha emiphakathini ezungeze izindawo zasethekwini.
Lo mcimbi ubusehoy Park, ethekwini izolo ngolwesihlanu lapho undunankulu unkk Nomusa Dube-ncube ubehola ithimba labaholi bemikhakha eyehlukene okubalwa umnu Sipho Hlomuka ongungqongqoshe womnyango wezokuthutha, ukuphepha nokuxhunyaniswa komphakathi bezokwethula izimoto, omakhalekhukhwini, imifaniswano, amalambu okukhanyisa nokunye.
Ziwu-95 izimoto ezethulelwe abaholi bezinhlaka zezokuphepha. Zonke izikhulumi bezikhuleka ezethamelini zomcimbi ukuba zibuyisele emandleni uhulumeni kakhongolose ngosuku lokhetho.
Elakuleli lizobamba ukhetho lukazwelonke nolwezifundazwe ngomhla ka-29 kunhlaba (May) kophezulu.
Abantu abaningi abebeseduze naleli phephandaba bakuvezile ukuthi bebekulindele ukuthi kuzokhankaswa futhi banovalo lokuthi kwazona lezi zimoto ezethuliwe, ngeke zifike emiphakathini okuthiwe zizosiza kuyona.
“Bona ngabe bayasho ukuthi bazokwethula izimoto ezizophuma zingene emizini yabantu ngenhloso yokugaya ivoti njengoba sekusondele ukhetho. Mina nje ngineminyaka ewu-23 ngiyilungu LE-CPF
Kwamashu, kudala sikhala ngezinsiza behlulwa wukusinika.
“Behlulwa ngisho wukusipha imali yensipho. Bekungazwakala kangcono ukuba bathe sonke masifike namapasi nama-bank akhawunti ngoba sesizoholelwa. Izimoto lezi ngeke zihlale kithi, kuthiwa zizogcinwa emizini yabaholi.
“Vele sikulindele ukuthi zizonikwa abantu abazovumelana nokuthi kuyokhankaswa ngazo njengoba kuthiwa kazinambandela wokuthi zihamba zigcinephi,” kusho ilungu LECPF elicele ukungadalulwa.
Ethula inkulumo uhlomuka,
ubalule nokuthi ubekhuluma komunye umsakazo okuthe uma egagula igama lenhlangano yakhe ephethe uhulumeni wakulesi sifundazwe, wavalwa emoyeni.
“Ngivele ngabona ukuthi le nto yombango wombhobho, ikhona kuzona zonke izindawo uma kuwukuthi okhulumayo, ukhuluma ngento ongayithandi. Noduma wawuhlwitha Kwaceza ngoba owayekhuluma, wayekhuluma into angayithandi,” esho kwachwaza itende.
Umnu Jabulani Sibisi oyilungu LECPF esiteshini samaphoyisa asemlazi, ibhekithemba, uthe uzokwenza umehluko umnikelo kahulumeni kodwa kuyobe kungaphelele uma kungethulwanga izinhlelo zokuqeqeshwa kwamalungu abo.
Unkk Dube-ncube uthe kuningi abebefisa ukukwenzela amalungu ezinhlaka zezokuphepha ngoba likhulu iqhaza lazo emiphakathini.
“Kasikafiki lapho esifisa ukufika khona. Lezi zimoto zizolawulwa eziteshini zamaphoyisa nakuhulumeni. Ngonyaka odlule sibambe umhlangano, sacela ukuthi yonke iminyango kahulumeni wesifundazwe inikele ngemali ethile ukuze kuliwe nesihlava sobugebengu.
“Iyona le mali esithenge ngayo lezi zinsiza. Kusebenze u-r30 million kuthengwa zonke lezi zinsiza. Sikhuthaza ukubambisana phakathi kwezinhlaka zokuphepha namaphoyisa ukuze kuliwe nobugebengu emiphakathini,” kuphetha unkk Dube-ncube.