Sengathi asezokwenza siphile kahle amaphoyisa kajenene umkhwanazi
MHLELI: Ngisuswa yile ndaba yokubulawa kwabesilisa abawu-9 ngamaphoyisa ngolwesithathu ezintatha emariannhill ngaphandle kancane kwasepinetown, entshonalanga yetheku.
Ngesikhathi ngiqala ukuzwa ngalolu daba kumabonakude ezintatha zangawo ulwesithathu, ngibe nokusola ukuthi kungenzeka ukuthi amaphoyisa sengathi aqinise kakhulu isandla kulezi zinsizwa.
Nokho ngokuhamba kosuku umqondo wami ujikile sengizwa usizi lwezisulu ebezikhala ngesihluku ebezithi zikholwa wukuthi besenziwa ngabafi.
Kunomama obalise ngokuthi kwadlwengulwa indodakazi yakhe ekhona endlini - wubulwane obunjani nje lobo? Ngiphinde ngafunda nakulona leli phephandaba ngolwesine ngobezikhalela ngokuthi wadlwengulwa phambi kwesoka lakhe, izelelesi zishintshana ngaye izikhawu ezine.
Kangiyisayiphathi-ke eyalo mama obezikhalela ngokuthi umyeni wakhe wamodeliswa phambi kwakhe namadodakazi akhe ehamba-ze, ngumuntu onjani owenza isihluku salolu hlobo?
Kuthe uma sengimunyunga zonke lezi zigameko, ngabona ukuthi amaphoyisa enze umsebenzi oncomekayo laphaya. Ngizwile nje kancane kuthiwa kunomndeni okhala ngokuthi indodana yawo ithole amachaphazelo kungafanele ngoba beyizihlalele kwamakhelwane wayo.
Umbuzo enginawo ngothi uhlala kanjani nabantu okwaziwayo ukuthi bayimigulukudu uma wena ungesiwona futhi wenzani nabantu abanukwa ngokuganga ebusuku kwesikabhadakazi? Uma bekukhona 'nabafana abazilungele' njengoba abanye besho kanjalo, bebenzani pho ebusuku kangaka nabantu okutholakale kubona izibhamu ezingekho emthethweni?
Konke kungenze ngavele kangaze ngaba nalo ngisho noluncane uzwelo emindenini yabo bonke abasale enkundleni ngesikhathi itholene phezulu namaphoyisa kajenene unhlanhla Mkhwanazi ongumkhuzi wamaphoyisa Kwazulu-natal - abukeka enza umsebenzi oncomekayo ethekwini namaphethelo ngokushanela izigilamkhuba emigwaqweni.