Uzizwa ebusisekile ngokuthola uthando koninakhulu bakhe
Izinkinga zimkhiphe ezinkundleni zokuxhumana oweswallows NGAPHANDLE KWENKUNDLA:
USAPHOKOPHELELE impumelelo kunobhutshuzwayo wakuleli ulindokuhle “Maleven” Mtshali ongumdlali wemoroka Swallows ebambane kwathula umoya ne-orlando Pirates kuba ngu-1-1 kowedstv Premiership esibheke kuvuthondaba njengoba sekuqala kuhlungeka abafana emadodeni.
Lo mdlali odabuka emphisi, Kwamaphumulo, wazalwa mhla ka-02 kundasa (March) ngo-1998.
Uthi waqala ukudlala ibhola esesesikoleni njengoba ethi wagcina esengukaputeni.
Emuva kwalapho uthi ugijime ekilabhini yangakubo eyayibizwa ngamazayoni, okuyilapho efunde khona izinto eziningi.
Uthi akasoze amkhohlwa utebogo Moloi wasecato Ridge owamhlanganisa nosimo Dladla owayeqeqesha ireal Kings ngaleso sikhathi.
Umtshali waba nesandla ekufakeni ikings esigabeni esikhokhelayo okufakazelwa wukuthi waqokwa njengomdlali owenza kahle kunabo bonke kowokuhlungela ukungena kwinational First Division.
Lokhu kwadonsa amehlo epirates eyamsayinisa kodwa yabuye yameboleka yona ikings, ngaphambi kokuba imdedele unomphela.
Emuva kwalokho uthathwe yilamontville Golden Arrows ngaphambi kokwedlulela esidlekeni sezinyoni, okuyilapho asaqhubeka khona nokwenza ezibukwayo.
Uthi ukuba ngaphansi kweso likadladla yikhona okwamkhulisa kakhulu. Uthi namanje basezwana kakhulu ngenxa yobudlelwano obuhle abalokhu baba nabo.
Ubalule nokuthi ukuya kwakhe kwi-arrows ngesikhathi sikamandla Ncikazi nosteve Komphela nakho kwaba nesandla esikhulu empumelelweni yakhe.
Ingxoxo kamtshali NELANGA Lempelasonto (I/L) ngempilo yakhe yangaphandle kwenkundla ihambe kanje:
I/L: Njengoba sewuhlala emadolobheni amakhulu yimuphi umehluko owubonayo ngempilo ukuqhathanisa neyasemakhaya?
Mtshali: Okuhle ngempilo yasemakhaya wukuthi iyakwazi ukukwakha futhi ikuqoqe, kanti eyasemadolobheni uzifundela wena ukuziphatha, uma uhlulwe yilokho, kusuke sekuphelile ngawe.
I/L: Utshabaza ngamotoni?
Mtshali: Ngihamba ngepolo R-line eblue. nomntwana nginaye, oyedwa.
I/L: Uma ungekho matasa, usichitha kanjani isikhathi sakho?
Mtshali: Njengomuntu ohlala kude nasekhaya, ngiyaye ngithathe lelo thuba ngivakashele ogogo bami ngokwehlukana kwabo. Kwesinye isikhathi ngivele ngizihlalele nengane yami.
I/L: Njengoba ubuyothenga igilosa nje ngolwesine, emuva kokushayela ikilabhu yakho igoli ngolwesithathu ebusuku, kuba njani ukuba phakathi kwabantu?
Mtshali: Kuyajabulisa ngoba kukwenza uzizwe ukwelinye izinga futhi kuyakukhuthaza, sengathi ungasebenza kakhulu kunakuqala. Njengoba kade ngisezitolo nje baningi abalandeli abebengijabulela.
I/L: Yikuphi okufisa kakhulu ngekusasa lakho?
Mtshali: Okuhamba phambili njengamanje wukwenza kahle ekilabhini yami ukuze sibe sendaweni ehloniphekile kwazise salahlekelwa ngabadlali abaningi (abaxoshwa ngomasingana January), manje sizama ngayo yonke indlela ukuthi sigcine izinyoni zisesidlekeni sazo.
I/L: Hlobo luni lomculo oluthandayo?
Mtshali: Kangiyena umuntu okhetha umculo, ngiyaye ngidlale lowo engisuke ngiwujabulela ngaleso sikhathi.
I/L: Ungameluleka uthini umdlali osemncane, osafisa ukungena kunobhutshuzwayo?
Mtshali: Kakukho okudlula ukuzinikela nenhlonipho kukhona konke okwenzayo.
Uma ufisa ukuphumelela, kumele ubulindele ubunzima ngoba yonke into inobunzima bayo.
Kumele ukholelwe kulokhu okufisayo, ungavumeli kube khona okuzokuphazamisa.
I/L: Yikuphi okukhumbulayo ngokukhula kwakho?
Mtshali: Ngikhule ngizidlalela ibhola ngiphinde ngiyobhukuda emfuleni
okuyinto
ebesiyenza eyayigcina seyisiqhatha nabazali ngoba sasihlala kakhulu.
Lokhu kwakwenza ukuthi nemfuyo igcine ingafiki ngesikhathi emakhaya.
I/L: Yikuphi okufundiswe ngabazali bakho?
Mtshali: Njengoba ngikhulele emakhaya nje, ngifundiswe izinto eziningi okubalwa kuzona inhlonipho nokwazisa abantu.
Indawo engikhulele kuyo ingenze ngakwazi ukuba yilo muntu enginguyena njengamanje, ngenxa yothando engiluthole khona ekukhuleni kwami.
I/L: Yikuphi okukhumbula ngabantu abakucathulisile?
Mtshali: Ngaba senhlanhleni yokuthola uthando lwabo bobabili ogogo bami, ozala ubaba nozala umama.
Okungijabulisayo wukuthi bobabili basaphila. Ukukhula phambi kwabo kwenza ukuthi impilo yami ibe lula.
Ngisabusisiwe nangabo bobabili abazali bami njengoba behlala benza isiqiniseko sokuthi konke ngikwenza ngendlela.
I/L: Uyakwazi nje ukupheka njengoba ukhulele phakathi komhlane nembeleko?
Mtshali: Ngiyazama, yize ngingeke ngithi ngiyakwazi. Ngiyaye ngipheke, ngikuzwe kudleka.
I/L: Ukhonze kudla kuni?
Mtshali: Kangiyena umuntu okhetha ukudla, ngiyaye ngidle noma yikuphi okusuke kulungele umzimba wami ngaleso sikhathi.
I/L: Uphatha hlobo luni lukamakhalekhukhwini?
Mtshali:
Ngiphatha i-iphone 14.
I/L: Ukhona ezinkundleni zokuxhumana?
Mtshali:
Bengikhona kodwa ngakhetha ukuphuma ngenxa yezinkinga ebezenzeka khona, engingeke ngikwazi ukuzidalula.
I/L: Ukhule uthanda baphi abadlali namakilabhu kuleli naphesheya kwezilwandle? Mtshali: Ngikhule ngithanda uthulani Serero noteko Modise eningizimu Afrika. Phesheya ngikhule bengizifela ngo-eden Hazard owaduma kwichelsea yasengilandi, okuyikilabhu engiyilandelayo. Kuleli ngikhule ngingumlandeli wekaizer Chiefs.