I-bay iphefumuliswa 'ngamadlozi espurs'
Untsundwana uthi kumele bayinqobe kumnyama kubomvu iswallows
MFANAFUTHI NDLOVU
IRICHARDS Bay FC iqiniswa idolo wukuqhubeka nokufulathelwa ngamadlozi kwecape Town Spurs ebambe ibhuleki kwi-log yedstv Premiership.
Lokhu kuzwakaliswe ngumgadli webay FC, usomila “Ballo” Ntsundwana ngesikhathi ephawula ngomdlalo wezakhe nemoroka Swallows wedstv Premiership ozokuba namuhla ngomgqibelo ngo15h00 eking Zwelithini Stadium, emlazi.
Untsundwana utshele ILANGA Lempelasonto ukuthi nakuba basakwazi ukuphefumula, babonga amadlozi espurs asalokhu eqhubeka nokufulathela le kilabhu yasecape Town ukuba ingabedluli, okuyinto athe ingabulala umoya.
Uthe bazolwela ukuthola amaphuzu agcwele kwiswallows yize ingenye yamakilabhu anzima njengoba idlala ibhola elihle. Uthi amaphuzu azobasiza ukuqhela kwispurs.
“Kusengenzeka noma yini kule midlalo esele. Okuhle nakakhulu wukuthi nespurs isadonsa kanzima ukuthola amaphuzu. Yikhona-ke lokhu okwenza ukuthi namanje sikwazi ukuphefumula.
“Sizimisele ngokulwela isithunzi sekilabhu kwiswallows. Ngiyazi ukuthi isefomini enhle kulezi zinsuku iswallows kodwa kasifuni ukulahla amaphuzu ekhaya,” esho.
Uthe konke kusemahlombe abo bengabadlali ukuzikhipha kulo mgodi abazifake kuwona ngokwehluleka ukuqoqa amaphuzu emidlalweni ebeyilula.
“Okuhle wukuthi abadlali bayalwa enkundleni kepha yinhlanhla esivimbayo. Kungaba yiphutha uma kungasolwa abaphathi bekilabhu noma abaqeqeshi ngesimo esikusona, umunwe kumele ubhekiswe kithina singabadlali,” esho.
Uthi umqeqeshi wabo uvusumuzi “Kanu” Vilakazi uzama konke okusemandleni ukubagcina bengekho ngaphansi kwengcindezi engabenza benze namaphutha angenasidingo ngoba sebexhamazela.
Ispurs kayinamdlalo ngale mpelasonto njengoba izoze ibhekane nemamelodi Sundowns kowepremiership ngolwesibili ngo-19h30 e-athlone Stadium, ecape Town.