KUFEZEKE IPHUPHO LIKAKOMPHELA NGOMDLALO WE-PIRATES

KUSAHAMBA ngokwezifiso zomqeqeshi welamontville Golden Arrows ezobhekana ne-orlando Pirates emdlalweni wedstv Premiership namuhla ngomgqibelo ngo-17h30 e-orlando Stadium, egoli.

I-arrows izokuya kulo mdlalo inogqozi njengoba ingakaze yehlulwe selokhu ijoyinwe ngukomphela.

Inqobe imidlalo emibili ngaphambi kokudlala ngokulingana nesupersport United kuba ngu-2-2 koweligi ngolwesithathu ebusuku empumalanga Stadium, ehammarsdale.

Usteve “Mphathi” Komphela, ocija i-arrows, ngemuva komdlalo nesupersport, utshele abezindaba ukuthi ubemincele ukuthi angalitholi ikhadi eliphuzi lesine ugladwin Shitolo (osesithombeni), oyisitobha sakhe, ngoba uzomdinga kakhulu uma sebevovana nebucs. Ushitolo uqokwe njengomdlali ovelele kowesupersport.

“Kuzofanele emdlalweni wepirates sigweme amaphutha esiwenze sidlala nesupersport.

“Ngibheke ukuba ulungelo Nguse aqhubeke nokuqabulisa ibhola inethi.

“Unekhono elihle, ngakho-ke kufanele simgqugquzele ukuba aqhubeke nokwenza umsebenzi wakhe.

“Bengibambe umoya ngoshitolo ukungalitholi ikhadi eliphuzi, ngenhlanhla sikwazile ukuqeda umdlalo engalitholanga.

“Kubalulekile nokuncoma umabhuti Khenyeza nomusa Bilankulu engibafice ekilabhini beyibambile, kabaze badla phansi, yize induku beyikhala.

“Isibindi sabo siyancomeka. Ebholeni akekho umuntu obalulekile kunomunye.

“Kumele sisebenze kanzima nasemdlalweni wepirates.

“Ngidinga okukodwa nje kubadlali, ukudlala ngendlela ye-arrows kuphela. Sidinga cishe amaphuzu awu-6 ukuze singene kwitop 8,” esho.

Uthe balindele umdlalo onzima kwibucs.

Ngakolunye uhlangothi, ezimnyama zizokuya kulo mdlalo ngaphandle kukankosinathi “Bhodlela” Sibisi othole ikhadi elibomvu ngesikhathi ezakhe zibambana ngo-1-1 nemoroka Swallows ngolwesithathu ebusuku edobsonville Stadium, esoweto.

Isiyonke imidlalo yedstv Premiership kule mpelasonto imi kanjena:namuhla NGOMGQIBELO

Eking Zwelithini Stadium:

Richards Bay FC vs Moroka Swallows 15h00.

Ebuffalo City Stadium: Chippa United vs Kaizer Chiefs 15h00.

E-orlando Stadium: Orlando Pirates vs Golden Arrows 17h30.

Edanie Craven Stadium: Stellenbosch FC vs Sekhukhune United 20h00.

Elucas Moripe Stadium: Supersport United vs TS Galaxy 20h00.

NGESONTO

Eharry Gwala Stadium: Royal AM vs Polokwane City 15h00.

E-DHL Cape Town Stadium: Cape Town City vs Amazulu FC 15h00.*