UNTULI USOLA IMPI YEPOLITIKI ‘EHLASELWA NGAMAPHOYISA KAHULUMENI’
USOLA ukusetshenziswa kabi kwezinsiza zikahulumeni ekulweni impi yepolitiki usihlalo wenkatha Freedom Party (IFP), umnu Thami Ntuli (osesithombeni) ‘ehlaselwa ngamaphoyisa ebumnyameni’ phakathi komgwaqo u-n2, ebusuku ephuma ethekwini emsakazweni igagasi FM ohlelweni lwezindaba.
Untuli utshele leli phephandaba ukuthi bekungenzeka noma yini ngempilo yakhe ngendlela okwenzeke ngayo, ethelekelwa ngamaphoyisa evimba izimoto ahamba ngazo, kwapeqululwa nezikhwama zakhe ebusuku endaweni embi.
Uthi uvinjwe ekhoneni ebumnyameni kwafunwa amalayisense ezibhamu eziphethwe ngonogada nawemvume yamalambu aluhlaza asezimotweni ahamba ngazo.
“Bekufanele kwenzeke noma yini ngendlela engivinjwe ngayo sengathi ngiyisigebengu. Bapequlule zonke izimoto nezikhwama ebengiziphethe. Lokhu kucace ngokusobala ukuthi yimizamo yokuvimba umkhankaso wethu ngoba abantu sebekhathele wokwenzekayo ezweni.
“Le mpi iqale ekokstad ngolwesithathu, sancishwa ihholo sesifikile, kwabekwa izaba ezingatheni zokuthi sifake isicelo sekusele isikhathi esincane,” kusho untuli.
Uthi ngesikhathi emiswa, bebengawakhanyisile namalambu aluhlaza. Utshele leli phephandaba ukuthi kuzona zonke izimo ezenzekayo njengamanje, ngeke zimthunaze ukuthi ayeke ukukhankasela ushintsho esifundazweni.
Ngokwemithombo YELANGA, kuthiwa ngesikhathi engaphakathi emsakazweni untuli kuqhubeka uhlelo, bekukhona iveni yamaphoyisa eyodwa ngaphandle, okusolwa ukuthi beyigade uma bephuma. Kuthiwa esephumile emsakazweni, kuqhamuke izimoto zamaphoyisa ezilinganiselwa ku-8 ebezimlandela.
“Bekuyitulo ebelihleliwe leli. Akwenzekanga ngendlela obekufiswa ngayo ngabathile uma bekukhona abanesandla,” kusho umthombo.
Amaphoyisa kuthiwa abheke ukuthi zonke izimoto ezinamalambu aluhlaza kufanele yini, abheka izibhamu amalayisense azo nokuthi zibhaliswe kanjani, ziphethwe ngabantu okufanele baziphathe yini.
Ekhuluma ngesigameko sokuvinjwa kwe-ifp ekokstad untuli, uthe bafike kule ndawo ngoba bedingwa ngabantu, bebona izithelo ezinhle kuzona zonke izindawo eziphethwe YI-IFP.
Uthi konke lokhu okwenzekayo, kucacela ngisho ingane encane ukuthi abathile banovalo nge-ifp.
“Lokhu sikubuka njengokwephucwa ilungelo lokukhankasa ngokukhululeka. Engani abanye abaholi bayafika ezindaweni eziphethwe YI-IFP, kodwa kasikaze sibavimbe nangolulodwa usuku,” esho.
Uthi kuphoqeleke ukuba kuyohlanganwa eharding ngaphansi komasipala umuziwabantu.